83.

1. Dies est laetitiae

In domo mentali,
Nam advenit hodie

Vi sacramentali
Jesus admirabilis,
Multam delectabilis

In humanitate,
Qui est ineffabilis
Et inaestimabilis

In divinitate.

2. Mortem Dei filius

Pro mundo passurus
Et a terra longius

In coelos iturus,
Manere realiter,
Vere corporaliter

Voluit in nobis,
In se transsubstantians
Panem et cor satians

In sanctis et probis.

3. Gaudeat catholicus

In hac fide sana,
Spernens, quod haereticus

Garrit verba vana,
Dedignando credere,
Cum non valet capere,

Quod fides ostendit,
Qui nec parvi flosculi
Seu vilis vermiculi

Cuncta comprehendit.

4. Ave, vivens hostia,

Veritas et vita,
In qua sacrificia

Cuncta sunt finita,
In quo se per saecula
Agnus sine macula

Offert patri Deo,
Mundans suo sanguine
Pium cor a crimine,

Quod fidit in eo.

5. Mane mecum, Domine,

Ut pie venisti,
Ne sine munimine

Sim in valle tristi:
Sine te subsistere
Nequeo seu vivere

In vita mortali,
Multo minus gratiam,
Meritum vel gloriam,

Quam non hahent mali.

6. Qui gustant, esuriunt

In palato mentis,
Et, qui bibunt, sitiunt,

Sine velamentis
Aperte te cernere,
Amplecti, constringere,

In quo salus tota,
Quorum nunquam aliter
Possunt integraliter

Adimpleri vota.

7. Aufer, Jesu Domine,

Pestes universas
Corporis et animae

Atque res adversas,
Defunctis fidelibus
Locum in coelestibus

Dona cum beatis,
In sanctis operibus
Da pacem hominibus

Bonae voluntatis.