107.

De ss. Johanne et Jacobo.

1. Duo unum genere,
Duo unum munere,

Unum sunt in gratia,
Duo unum nomine,
Duo unum lumine,

Unum sunt in gloria.

2. Duo sunt virginei,
Duo consanguinei

Gubernantis omnia,
Duo sunt prophetici,
Duo evangelici

Testes in ecclesia.

De sancto Leodegario.

1. Ovans chorus scholarium
Almum Leodegarium
Psallendo carmen varium

Pura colit mente.
Clara ortus prosapia,
Nutritus aula regia,
Sacra perdiscens studia

Didone docente.
R O trina de aureola

Gaudens, Leodegari,
Trina fortis areola
Laetarisque stoleola,
Pro tuis preces cumula,

Ut queant beari.

2. Fide firmatus triplici,
Securus spe multiplici,
Dilectione duplici

Floruit beatus,
Bino felix charismate,
Mundum rigavit dogmate,
Corusco diademate

Fuit laureatus.
R O trina de aureola

Gaudens, Leodegari,
Trina fortis areola
Laetarisque stoleola,
Pro tuis preces cumula,

Ut queant beari.

i. De passionis rivulis
Bibens privatur oculis,
Lingua, labris, ne populis

Praedicet aeterna;
Nova fandi potentia
Refert Dei magnalia,
Caput exaltans gaudia

Meruit superna.