Exhortatio ad bellum sacrum.
231.

1. Crucifigat omnes
Domini crux altera,
Nova Cbristi vulnera,
Arbor salutifera,

Perditum sepulchrum
Gens evertit extera

Violente,

Plena gente

Sola sedet civitas,

Agni foedus

Rapit hoedus,

Plorat oves perditas
Sponsa Sion, immolatur
Ananias, incurvatur
Cornu David, flagellatur

Mundus,
Ab injustis abdicatur,
Per quem juste judicatur

Mundus.

2. O quam dignos luctus,
Exsulat rex omnium,
Baculus fidelium
Sustinet opprobrium

Gentis infidelis,
Cedit parti gentium

Pars totalis

Jam regalis

In luto et latere

Et laborat,

Tellus plorat
Moysen fatiscere.
Homo, Dei miserere,
Fili, patris jus tuere,
In incerto certum quaere,

Ducis
Ducum dona promerere
Et lucrare lucem verae

Lucis.

3. Quisquis es signatus
Fidei caractere,
Fidem factis assere,
Rugientes contere

Catulos leonum,
Miserans intuere

Corde tristi

Damnum, Christi,

Longus Cedar incola,

Surge, vide,

Ne de fide

Reproberis frivola,
Sudat martyr in agone
Spe mercedis et coronae,
Derelicta Babilone

Pugna
Pro coelesti regione,
Aqua vitae te compone

Pugna.