216.

1. O curas hominum,
Quas curat curia,
O quorum studia
Non habent terminum,
Talium si fidem
Incurreret,
Desereret
Pylades Atridem,
Alter enim Theseus

Suum fastidit Thesea,
Ubi regnat Protheus
Et fati ludit alea.

2. Ab aula principis,
Si nihil habeas,
Oportet abeas,
Spem vanam concipis,
Tenuis fortuna,
Omnimoda
Ad commoda
Hominum mens una;
A quo nihil emungitur,

Opus perdit et operam,
Quod habenti dabitur,
Tenent omnes ad literam.

3. In lucrum vertitur
Censurae levitas,
Fracta securitas
Danti remittitur,

Explicas decreta

Ad libitum,

Si sonitum

Dederit moneta;

Plenis aere sacculis

Rei poena minuitur,

Locum dic a loculis

Unde, locus si quaeritur.