125.

1. Cantu miro, summa laude
Summo viro, vir, applaude,

Quem confortat,
Cujus dextra largitatis
Intus, extra desolatis

Opem portat.

2. Pietatis hic patronus
Gravitatis fugat onus,

Hoc quod gravat,
Praesens orbis consolator,
Salus morbi et curator,

Quos vult lavat.

3. Sedat fluctus procellosos,
Nautae luctus lacrimosos

Dum revisit,
Patri defert mersum natum,
Quando refert vas auratum,

Quod promisit.

4. Tres consortes liberavit,
Quos occulte trucidavit

Hospes reus.
Reddit furans, quod furatur,
Deum curans baptizatur
Hinc Judaeus.

5. Jure parens fit jucundus,
Ter apparens auri pondus

Quem ditavit,
Quo tres presto venumdari
Ab infesto lupanari

Revocavit.

G. Ergo, Christe, fili Dei,
Per quem iste causa spei

Ut sol micat,
Hac in die plebs festiva
Tibi pie mente viva
Benedicat.