207.

1. Licet aeger cum aegrotis,
Et ignotus cum ignotis,
Fungar tamen vice cotis,
Jus usurpans sacerdotis.

Flete, Sion filiae,

Praesides ecclesiae

Imitantur hodie
Christum a remotis.
2. Jacet ordo clericalis
In respectu laicalis,
Sponsa Christi fit mercalis,
Generosa generalis,

Veneunt altaria,

Yenit eucharistia,

Cum sit nugatoria
Gratia venalis.

3. Donum Dei non donatur,
Nisi gratis conferatur;
Nam qui vendit vel mercatur,
Lepra Syri vulneratur;

Quem sic ambit ambitus,

Idolorum servitus,

Templo sancti spiritus
Non compaginatur.
4. Si quis tenet hunc tenorem,
Frustra dicit se pastorem
Nec se regit ut rectorem
Renum mersus in ardorem;

Haec est enim alia

Sanguisugae filia,

Quam venalis curia
Duxit in uxorem.

5. In diebus juventutis
Timent annos senectutis,
Ne ut forma destitutis
Desit eis splendor cutis,

Et dum quaerunt medium,

Vergunt in contrarium.

Fallit enim vitium
Specie virtutis.
6. Ut jam loquar inamoenum,
Sanctum chrisma datur venum,
Juvenantur corda senum
Nec refrenant motus renum,

Senes et decrepiti

Quasi modo geniti

Nectaris illiciti
Hauriunt venenum.

7. Vos, praelati venerati
Et quam digne sublimati,
Si non portatis, heu, gratis
Nomen frustra sanctitatis,
Dicitis, non facitis,
Gregi normam enormitis,
Scandala porigitis,
Fontem perturbatis.
8. Et quod placet, si non vacet,
Actitare non timetis,
Militari condonari
Rem communem non negatis;
Quare non perpenditis,
Quod de rebus creditis
Rationem Domino
Ponere debetis?

9. Vel si Deum non timetis,
Cujus vice praesidetis,
Saltem tamen perpendatis,
Quia Christum detrectatis,
Qui se ipsum praebuit
Formam et exhibuit,
Quem dum vos confunditis,
Confundi non timetis.