105.

De s. Johanne Baptista.

la. Psallat concors symphonia
Laudem Christi praeconis,

lb. Euge dulcis euphonia,

Pange rhythmos cum tonis.

2a. Laudat chorus organicus
Per graves ab acutis

2b. Et plaudat omnis lyricus
In modulis argutis.

3a. Suavis sonet harmonia
Dulces melos,

Vocem jucunditatis,

3b. Sine doli lascivia,
Sed gaudiis

Ignitae caritatis.

4a. Accendat nos empyreum
Pneuma sacro fulgore

4b. Cor et illustrans igneam
Divino sub ardore.

5a. Solve polluti

labii peccamina,

5b. Baptista felix,

pia per precamina.

6a. Ut pura sint mundati
oris famina

6b. Fiantque tibi grata
nostra carmina.

7 a. Salve, praecursor nobilis,
pacis dogma per orbem
seminasti,

7b. Testis aeterni numinis,

agnum venturum mundo
demonstrasti.

8a. Inter prophetas maximus,
Apostolis praelatus,

8b. Martyrio sanctissimus
Triumphas laureatus.

9a. Tu trinitatis vernulus,
Baptismatis pincerna,

9b. Tu sanctitatis formula,
Lucens lucis lucerna.

10a. Johannes, Dei gratia
Divinitus vocaris,

10b. Coelestis regni gaudia
Scintillans tuis caris.

lla. Doctorum fulges almo
privilegio,

11b. Praeclarae castitatis
flores lilio.

12a. Quem angelus

ab arce poli nuntius

12b. Praenuntiat

vitae futurae praescius.

13a. O quam felix nativitas,
Quae meruit
De coelis nuntiari,

13b. Nomen cujus immensitas
Digna fuit
Per angelum portari.

14a. Quam stupenda, quam benigna
caritas

14b. Quam sancta, quam laudabilis
jucunditas.

15a. Regem coelorum senseras
Ventris obstruso
positus cubili,

15b. Dum matris exsultaveras
Alvo resultans
motu puerili.

16a. Confers loquelam genitus
Sublatam Zachariae

16b. Et praestas isdem penitus
Veritatem prophetiae.

17a. Fugis mundanas tenebras,
Spernis peccati morem,

17b. Subis deserti latebras

Christi propter amorem.

18a. Salve, mundi speculum,
Nostrorum spectaculum,
Vera virtus omnium
Credentium.

18b. Baptizator gentium,
Consolator mentium,
Salus et solatium
Moerentium.

18c Fidei vestigium,
Ex agro gentilium
Exstirpasti lolium
Errantium.

19a. Tibi potum fons ministrat,
Pastum favus mellis,
Cujus vita nos magistrat
Altior stellis.

19 b. Vox clamantis in deserto
Parans vitae viam,
Cujus docens in aperto
Matrem Mariam.

19c. Baptizari meruisti

Vivam formam panis,
Benedictum corpus Christi,
Rivo Jordanis.

20a. In columbae specie
Spiritus prudentiae,
Fides, vox laetitiae,
Spes gloriae.

20b. Vox auditur regiae
Patris sapientiae,
Regis coeli curiae,
Vox gloriae.

21a. Hic est verus et electus
Rex perennis vitae,
Meus filius dilectus,
Ipsum audite.

21b. Eujus sanctae visionis
Testis comprobaris
Et paternae jussionis
Dicta sectaris.

22a. O dulcedo luminum,

Johannes, summa legis,
Lucens ante Dominum,
Miles superni regis.

22b. Sator evangelii,

Propheta veritatis,
Restitutor gaudii,
Destructor vanitatis.

23a. Verum mundi florem,
Flore dulciorem,
Salutis auctorem, *
Puro puriorem, *

Trium centupliciter *
In coelis aeternarum

Eructuans solemniter
Triumpho coronarum,

23b. Saevi regis feritas
Insana decollavit,
* Hinc Dei gratuitas
* Te digne coronavit.

* Salve, beatorum
Civis angelorum,
Illustrator morum,
Gloria polorum.

23c. Trames rectitudinis,

Sanctorum fortitudo,
Laus beatitudinis,
Virtutum magnitudo,

Lux aeternitatis,
Favus pietatis,
Decus aequitatis,
Splendor claritatis.

24a. Tuis sacris precibus
Adesto naufragatis,
Ut completis laudibus
Solvamur a peccatis.

24b. Purga sordes cordium
Origo bonitatis,
Da salutis gaudium,
Corona largitatis.