255.

De Urbe Turonensi.

1a. In ripa Ligeris

Est Martinopolis,

Urbs orbem temperans,
Orbis gemma,

lb. Asylum miseris,
Parem apostolis
Patronum venerans,
Urbs suprema.

2a. Polis est civitas,
Polis pluralitas,
Polis jucunditas,
Polis distractio,

2b. Haec polis civitas,
Poleon deitas,
Cuilibet veritas,
Magistra, ratio.

3a. Multiplex loci titulus

Laudis captat praeconium,
Sed titulorum cumulus
Vincit styli officium,

3b. Patronus, clerus, populus,
Ubertas temporalium,
Ceres, Liber, fons, hortulus,
Amnes, prata convallium.

4a. Aeris clementia,

Coeli constellatio,

Solis redundantia,
Morum compositio,

Largitas et honestas,

4b. Turonis vernantia
Uno quasi gremio

Colunt domicilia,
Exsulat seditio

Et guerrarum tempestas.

5a. Ergo sicut carbunculus
Et flosculus
Turonis micat urbibus
Et sedibus
Fecunde

5b. Gallus, Hispanus, Apulus
Et Graeculus
Invident Turonensibus
Cum urbibus
Profunde.