30.

1. In paschali gaudio,

Coelum, terra plaudat,
Jesu namque passio

Evae mortem damnat;
Christus cruce moritur,
Caro busto traditur,

Anima abyssum
Destruit et spoliat,
Vinctos inde liberat,

Reddit paradisum.

2. Ex inferno rediens

Praeda secum pergit,
Flatum carni uniens

Gloriose surgit;
Matrem tristem visitat,
Liberum se comprobat

Mortis ab aerumnis,
Edens cum discipulis,
Apparendo feminis,

Fidei alumnis.

3. Salvatoris vulnera

Thomas contrectavit,
Ejus cor et latera,

Fidem solidavit;
Gaudet de victoria
Christi de tribu Juda

Quisque electorum,
Quibus mandat Dominus,
Fidem fari gentibus

Et regnum coelorum.

4. Voces nostrae gloriam

Resurgenti Christo
Suam ob victoriam

Dicant corde toto,
Alleluja jugiter
Resonemus dulciter,

Qui sumus saluti
Corporis et animae
Ac coelestis patriae

Viis restituti.

5. Surgere a vitiis

Fac nos ad virtutes
Sacrisque deliciis

Reple hic degentes;
Jesu, coeli gaudium
Et corona virginum,

Pacis fer solamen,
In extremo tempore
Tecum quoque vivere

Praesta nobis. Amen.