74.

1. O qui fontem gratiae

Captivis regeneras,
Coelos endelechiae

Foedere confoederas,
Ordinata serie

Mundi motus temperas,
Hyles in temperie

Effrenata cohibes

Et dissolvi prohibes,

Ut leges, quas adhibes,
Elementa teneant
Et concordi coeant

Dispositione.
R O summa potentia,
Inter dissidentia

Firma firmans foedera,

Ut supera

Sic infera,
Refraenas illicita,
Digna pensans merita

Retributione.

2. Legem foederis
Imponis superis

Conservans supera,
Coelum innumeris
Moves in numeris

Et coeli sidera;
Tu coelum circulis,
Tu motus regulis

Stringis erraticos,

Tu nexus musicos
Innectis dissonis,
Ex quibus consonis
Tonis mellisonis

Reddis harmonias,
Qui propriis
Officiis

Signas hierarchias.
R O summa potentia,
Inter dissidentia

Firma firmans foedera

Ut supera etc.

3. Ergo qui tam dissona

Cogis consonare,
Quae divinae consona

Legi, moderare
Melos, quod divinitus
Tuus spirat spiritus,
Nobis missus coelitus,

Plenius inspiret,
Enormes ejiciat,
Concordes efficiat

Quos expiat,

Sic puniat
Ut vices, quas variat
Alternis sic uniat,

Ne lyra deliret.