De sancto Dionysio.
95.

1. Jucundare, Gallia
Illustris et martia,

Patre Dionysio,
Eructa propitia
Laudis sacrificia

In ejus solemnio.

2. Hic Atheniensium
Linquens pontificium

Clementis imperio
In regnum egregium
Francorum rebellium

Venit conductu dio.

3. Inde Christi nuntius,
Cujus erat socius
Cum Eleutherio
Rusticus, vir hagius,
Replevit Parisius
Divino seminio.

4. Praeses urbis Gallicae
Fidei catholicae

Pullulante radio
Praecepit tyrannice,
Dei servos publice

Exponi martyrio.

5. Catasta et verbere,
Crate, fune, carcere

Et crucis supplicio
Superatis facere
Festum coeperunt fere

Divino consilio.

6. Lictor tandem inclitum
Seniorum, fruitum

Coelesti edulio,
Praesentia comitum
Per praesidis monitum

Subjugavit gladio.

7. Exoremus, socii,
Ut expulsa vitii

Sorde nobis passio
Sancti Dionysii
In hujus exsilii

Succurrat exitio.