Lamentatio animae peccata deflentis.
160.

R Canticum laetitiae

Vertens in lamenta
Cano poenitentiae
Lugens monimenta.

1. Temporum memoria
Me replet angustia,
Dum cerno, quod nescia

Defluxit juventa,
Fluxit ejus gloria

Nulla spe retenta.

2. En tempus exiguum,
Datum ad proficuum,
Elapsum est vacuum,

Elapsa momenta,
Restatque perpetuum

Tempus ad tormenta.

3. Deserta prudentia
Virtuteque socia
Erravi per devia

Spernens documenta.
Lapsus sum ad vitia,

Mortis alimenta.

4. Facienda respui,
Feci, quae non debui,
Caducis exposui

Accepta talenta;
Unde miser merui

Cocyti fluenta.

5. Foeda gessi sensibus,
Abusus sum viribus,
Corpus dedi turpibus

Vivens ut jumenta,
Vinctus sum reatibus

Metens detrimenta.

6. Factorem deserui,
Factum mundum colui,
Satanae me praebui

Sequens temptamenta,
In malis computrui

Ut res caenulenta.

7. Heu, miser, quid faciam,
Quando talis veniam
Ad Christi praesentiam

Inter monumenta,
Qui reddet justitiam

Secundum inventa.

8. Dolens ergo doleo,
Tanta mala defleo
Aeternaque timeo

Plus cruciamenta,
Quae malorum video

Fore complementa.

9. O Deus piissime,
Pater clementissime,
Inter lucius audi me,

Inter vexamenta,
Captivumque redime

De manu cruenta.

10. Dele, pater, scelera,
Pensa, pater, pondera,
Vide, pater, vulnera,

Fer medicamenta,
Monstra, pater, foedera

Ad tua figmenta.