182.
De Curia Romana.

1. Bulla fulminante,
Sub judice tonante
Reo appellante,
Sententia gravante
Veritas supprimitur,
Distrahitur
Et venditur,
Justitia prostante;
Itur et recurritur
Ad curiam, nec ante
Quid consequitur,
Quam exuitur quadrante.

2. Papae janitores
Cerbero surdiores,
In spe vana plores,
Nam, etiamsi fores
Orpheus, quam audiit
Pluton, Deus
Tartareus,
Non ideo perores,
Malleus argenteus
Ni feriat ad fores,
Ubi Protheus
Variat mille colores.

3. Si quaeris praebendas,
Frustra vitam praetendas,
Mores non commendas,
Ne judicem offendas,
Frustra tuis literis
Inniteris,
Moraberis

Per plurimas Kalendas,
Tandem exspectaveris
A ceteris ferendas,
Paris ponderis
Pretio nisi contendas.

4. Jupiter dum orat
Danem, frustra laborat,
Sed eam deflorat,
Auro dum se colorat;
Auro nil potentius,
Nil gratius,
Nec Tullius
Facundius perorat,
Sed hos urit acrius,
Quos amplius honorat,
Nihil justius,
Calidum crassus dum vorat.