206.

1. Mundus, a munditia
Dictus per contraria,
Sordet immunditia

Criminum,
Crescit in malitia,

Culpa nescit terminum.
2. Omnis immunditiae
Clerus fons est hodie,
Capita malitiae

Praesules,
Nec tot pestis variae
Monstra vidit Hercules.
3. Sordium spurcitia
Currit ad declivia,
Praesulum flagitia

Plangite,
Quia fluunt vitia

Ad membra de capite.
4. Ubi nunc justitia,
Ubi sanctimonia?
Perit in astutia

Veritas,
Duplex est malitia
Simulata aequitas.

5. Sola simulatio
Gaudet privilegio,
Simultatis bivio

Currite,
Fictionis studio

Praevalent hypocritae.

6. Nunc prece, nunc pretio,
Nunc vi fit intrusio,
Divitum conditio

Potior,
Praeminet officio
Ditior, non dignior.

7. Caeca fit provisio,
Caeci sedent solio,
Ut caecorum regio

Francia,
Habitu privatio

Praestat in ecclesia.
8. Nihil prodest mathesis,
Nil logos, nil poesis,
Aurum plus quam fronesis

Ponderat,
Nisi trahat Lachesis,
Clotho frustra ponderat.

9. Simoniae laqueum,
Spoliorum puteum,
Falsitatis Proteum

Fugite
Nec talentum plumbeum
Auro plus appendite.