De Simonia.
217.

1. Frigescente caritatis

In terris igniculo
Universae vanitatis

Fons inundat saeculo,

Brevi sub articulo
Audietur vastitatis

Gemitus in populo.
2. Ecce, florent venditores

Spiritalis gratiae,
Antichristi praecursores,

Pastores ecclesiae,

Fures eucharistiae,
Novi Judae successores

Christum vendunt hodie.

3. Martha foris occupatur
Quaerens lucri gratiam,

Soror Marthae contemplatur
Nummos et pecuniam,
Igitur ad perfidiam

Aurum Christi occultatur,
Versum est in scoriam.
4. Hoc sancivit mos Romanus,
Hoc decretum legitur,

Quod sit praesul vel decanus
Hic, a quo plus dabitur,
Unde recte dicitur:

Roma quasi rodens manus.
Per quam mundus roditur.

6. Novitas signata mire
Est in causa Romuli,

Si vis recte definire
Circulum quadranguli
Satione calculi,

Romae potes invenire
Quadraturam circuli.

5. Leges silent, jura tacent
Nullo fulta stipite,

Luxus et rapina placent
In hoc mundi tramite,
Errat plebs cum milite,

Lapidesque sancti jacent
In via cum capite.

7. Bursa quadrans est figura,

Circulus denarii,
Quem dum bursat bursatura,

Signum est indicii,

Quod patres et filii
Solidantur hac usura

In fermento veteri.