1. De beata Maria V.

1. Ad aeterni numinis

cumulum honoris
Dicturus praeconia

nostri salvatoris
Insigniri gratia

tam sensus quam oris
Obsecro, nam linguae sum

impeditioris.

2. Hoc enim miserrimo

mihi peccatori
Dixisse plus congruit

quam legislatori,
Cuius sapientiam

effluentem ori
Placuit infundere

summo creatori.
3. Ego vero sordida

plenus actione,
Degens in superbia

et abusione,
Omnibus dissimilem

comparatione
Praesumam attollere

qua praesumptionc?

4. Cuius ad imperium

mundi salutare,
Christus Iesus, subdidit.

caelum, terram, mare,
Quomodo vel qualiter

audebo laudare,
Quam nec saltem dignus sum

ore nominare?
5. Ad haec tamen sentiam

me licet immundum,
Christum Iesum deprecor,

qui redemit mundum,
Ut meum eloquium

sit ei iucundum,
Qui potens est facere

de immundo mundum.

6. Ne, quoniam laudibus

intento Mariae,
Quae gigantem genuit

geminae usiae,
Eo, quod indignus sim,

vel nocte vel die
Accidat, quod accidit

olim Adoniae.
7. Mariam dilucide

satis exprimebat
Illa scala, dormiens

quam Iacob videbat,
Cui innixus Dominus

Deus apparebat,
Et quae caelum pariter

et terram tangebat.
8. Haec est enim pervia

scala peccatorum,
Qua libet ascendere

cacumen caelorum.
Huic ipse Dominus

innixus suorum
Vota pie suscipit

et preces servorum.

9. Haec ut Saba sapiens

regina Sybilla,
Sed multum humilior

utique quam illa,
Gabrieli nuntio

respondit tranquilla:
Ecce, inquit, cuius es

angelus, ancilla.

10. O felix humilitas!

ecce, mater Dei
Ancillam se nominat,

cum constaret ei,
Quod totius pareret

conditorem rei,
Qui disponit tempora

cursusque diei.

11. Videtur Abigail

istam designare,
Quae, cum David placuit

ipsam desponsare,
Volens coram nuntiis

se humiliare,
Pedes eius obtulit

se ipsam lavare.

12. Figuram huiusmodi

Rebecca praetendit,
Quae narrante puero

dum sibi attendit,
Quod per agrum obviam

Isaac ascendit,
De camelo protinus

ad terram descendit.

13. Lia ventris admodum

fructu gratiosa,
At Rachele facie

minas speciosa,
Designari poterit,

ut exponit glosa,
Haec inter Ierusalem

filias formosa.

14. Hesther, per quam reddita

salus est Iudaeo,
Et crux, quam paraverat

Amam Mardochaeo,
Facta figuraliter

designat ex eo
Gratam singulariter

hanc reginam Deo.

15. Iterum si conspicis

oculis internis,
Spiritum a litera

si bene discernis,
En, Iudith alterius

hostis Holofernis,
Eius, inquam, cuius est

locus in infernis.

16. Arcam iussu Domini
Noe construebat,
Quae salvavit intra se,
quidquid continebat,

Homines et pecora,
quae secum tollebat,

Cum aqua diluvii
cuncta consumebat.

17. Si scripturae iunxeris

sensum et sophiam,
Per arcam intelleges

virginem Mariani,
Quae suo continuit

in alvo Messiam,
Ad vitae quo rediit

omnis caro viam.

18. Per columbam etiam

in ore gestantem
Olivam, clementiae

signum, designantem
Gabrielem virgini

fata nuntiantem,
Quod misericordiae

portaret infantem.

19. Abnegat incredulus

haec dicta ludaeus
Et infelicissimus

ille Manichaeus,
Quos ita corripiet

sequens sermo meus,
Quod adiudicabitur

hic et ille reus.

20. Tibi loquar igitur,

perfide Iudaee,
Ausculta similiter

et tu, Manichaee,
Dum transiret Dominus

mare Gallilaeae,
Dixit: "me sequimini"

Petro et Andreae.

21. Ita me sequimini

non gressum movendo
Nec utcumque gressibus

pedum incedendo,
Sed ipsum iustitiae

solem intuendo,
Quem vos pertinaciter

negare perpendo.

22. Vos, inquam, conveniam,

non dico factores,
Sed tantum Mosaicae

legis auditores,
Qui sunt, quos in invicem

confertis, errores
Adversus catholicae

fidei cultores?

23. Nonne scriptum legitis:

in ore duorum
Stabit testimonium ?

sed quid, si multorum
Utar testimoniis

ad robur dictorum,
Oredetisne testibus

vel dictis eorum?

24. Isaias siquidem

propheta testatur,
Ieremias asserit

hoc et praelibatur,
Per quos et per alios

patenter probatur,
Quod Iesus ex virgine

Maria nascatur.

25. Labiis quodammodo

vir incircumcisus,
Sed hinc a catholica

fide non divisus,
Quaero, quid significet

Danieli visus
Lapis, sine manibus

de monte praecisus.

26. Quid designet etiam,

quod rubus ardebat
Et rubum nullatenus

ignis comburebat ;
Haec utraque visio

videntes latebat
Et profecto virginis

partum exprimebat.

27. David, cum senuerat,
Abisag fovebat
Et regem, ut legimus,
calefaciebat,

Sed nec rex carnaliter
eam cognoscebat,

Nec a rege maculam
ipsa contrahebat.

28. Sic, sic Dei genetrix

et incorporavit
Deum et virgineum

florem conservavit,
Quod Iudaeus audiens

hucusque negavit
Et sicut, quae periit,

ovis sic erravit.

29. Dic, quicunque crederis

esse vel fuisse
Discussor et arbiter

virtutis praemissae,
Quid est mirabilius

partum concessisse
Virgini, an hominem

de terra fecisse?

30. Si esse contenderis

contra carnis iura,
Quod virgo conciperet

sine genitura,
Die, si nosti, cuius est

haec ipsa natura,
Qua traxit originem

omnis creatura?

31. Moyses dominicum

mandatum complebat
Et de cunctis tribubus

virgas adferebat,
Inter quas, quae fuerat

Aaron, frondebat
Et post diem alterum

nuces producebat.

32. Delectat mysterium

hoc magnum videre
Et contra Iudaicam

haeresim miscere,
Quae Deum in virgine

denegat complere,
Quod liquet ad oculum

in virga patere.

33. Qui dedit, ut arida

virga pullularet,
Fecit, ut et filium

virgo procrearet,
Qui mortalis propter nos

si non expiaret,
Nunquam nos a debita

morte liberaret.

34. Numquid non de virgine

potuit creare
Deus, quem de pulvere

noluit formare?
Si velle prospicitur,

de posse tractare
Non decet, nam potens est

cuncta renovare.

35. Cesset incredulitas

cuiusve Iudaei
Proinde potentiam

blasphemare Dei,
Cesset, inquam, supplici

voce clamans ei:
Iesu, fili virginis,

miserere mei.

36. Rex Aegypti Pharao

vidit una vice,
Refert ut historia,

quodque septem spicae
Pullulabant pariter

ex una radice,
Quod exponi poterit

de illa felice.

37. Per formosas etenim

spicas, ut expressit
Ioseph regis somnium,

secura repressit
Famem abundantia,

quam large concessit,
Ex hac sacra virgine

fructus qui processit.

38. Supra tempus capitis
Sisarae ponebat
Iahel clavum ferreum
et clavo transfigebat,

Quod effectualiter
Maria complebat,

Cum serpentis veteris
caput conterebat.

39. Haec [virgo] est mulier,

quae circumdat virum
Conimedentem pariter

et mel et butyrum,
Hoc dixisse dicimus

non esse delirum,
Quod dixit veridicus

propheta, nec mirum.

40. Sareptana vidua

Maria signatur,
Cui lechytus olei

non minuebatur,
Et farinae hydria

magis augebatur,
Ut Helias Domini

servus loquebatur.

41. Hanc vocare poteris

etiam, si velis,
Per Annam, quae fuerat

mater Samuelis,
Quem sub Heli voverat,

ut voto fidelis
Serviturum obtulit

Domino de caelis.

42. Haec est nominaliter

dicta maris stella,
Qua sedatur saepius

marina procella,
Haec pudoris thalamus,

haec unguenti cella,
Haec, quae sola dicitur

mater et puella.

43. Haec columna populum

Israel deducens,
Quo tendebat, lucide

de nocte reducens,
Haec ad vitae ianuam

semita perducens,
Haec, per quam seducitur

Satan nos seducens.

44. Haec est arca continens

manna delicatum,
Haec sancti sacrarium

spiritus sacratum,
Haec funda proiciens

petram, qua prostratum
Ab inermi legimus

Goliath armatum.

45. Haec est virga florida

Iesse, patris David,
Stella Iacob, Balaam

de qua prophetavit.
Haec, auditum filii

cuius auscultavit,
Inter animalia

Habacuc et pavit.

46. Haec, clausam Ezechiel

quam consideravit
Porta, vir nec exiit

per quam nec intravit,
Haec cisterna Bethlehem,

cuius asservavit
Aquam David, Domino

Deo quam libavit.

47. Hanc, ut brevis persequar

seriem sermonis,
Mystice significant

vellus Gedeonis,
Moysi vas scirpeum,

thronus Salomonis,
Aureum candelabrum

et mons visionis.

48. Mulier, sub pedibus

quae lunam tenebat
Et veste circumdata

solis apparebat,
Mariam aptissime

signans innuebat,
Quae verum iustit) ac

solem pariebat.

49. Conquievit populi

murmur mox aperto.
Quod aqua de silice
fluxit in deserto,

Virga, qua percutitur
in saxo reperto,

Virginis est filius,
ut placet diserto.

50. Illa Ierosolymis

salutis piscina,
In quam descendentibus

datur medicina,
Intellegi poterit

haec mundi regina,
Quae medetur languidis

virtute divina.

51. His et huiuscemodi

rebus designata,
Iam supra caeligenas

omnes exaltata,
Condescende miseris,

o virgo beata,
Quia nostra diceris

et es adovocata.

52. Regina, quae praesides

et primatum tenes
Super omnes virgines,

iuvenes et senes,
Reos reconcilia

servos eum penes,
Qui corda diiudicat

et scrutatur renes.

53. Te commendat gloria

matrem virginalis
Nec deflorat virginem

partus filialis,
De te prodit filius

patri coaequalis
Et ei per omnia

consubstantialis.

54. Maria, dulcissima

mater salvatoris,
Quae sanctorum omnium

es praelata choris,
Recordare, quaesumus,

tui quod honoris
Summa sit occasio

culpa peccatoris.

55. Signanter necessitas

quaenam videretur,
Verbum carnem fieri

per quam pateretur,
Si delictum hominis,

quod redimeretur
Sua morte, penitus

non inveniretur?
56. Constat ergo, domina

mundi praeelecta,
Quod pro peccatoribus

mater sis effecta,
Quos eidem, cuius sunt

opera perfecta,
Complacere facias

a Deo dilecta.

57. Nos quidem, nos fragiles

et ad malum proni,
Privamur hic, proh dolor,

omnis fructu boni,
Sed tuae committimus

miserationi
Nos et nostra subdimus

tuae ditioni.
58. Ne frustremur igitur

spe, quam reportamus
De te, cuius totiens

nomen invocamus,
Quae si non subveneris

nobis, ignoramus,
Quid in his miseriis

ultra faciamus.

59. Admitte, piissima

mater, hoc dictamen
Et sic te petentibus

impende iuvamen,
Ut cum factum fuerit

ultimum examen,
Vivamus in saecula

saeculorum. Amen.