150. De beata Maria V.

Salve, scala poli, sanctae iunctissima proli,

Digne digna coli, miserum me spernere noli.

O mundi domina, fer opem, precor, atque propina,

Ut milii divina per te pareat medicina.
5. O pia virgo, soles vitiorum pellere moles,

Quem recreare voles, recreabit eum tua proles.

Fons es dulcoris et fax totius amoris,

Virginei floris es gemma, thesaurus pudoris.

Tu salvatoris speculum, tu culmen honoris,
10. In superis oris es summa stella nitoris.

Te sequor, esto via misero mihi, sancta Maria,

Ut sic te media pateat placatio dia.

Omnibus adiutis te praeside teque secutis

Es via virtutis, via vitae, porta salutis.
15. Virgo Deo plena, virgo pia, virgo serena,

Es veniae vena, dulcore salutis amoena.

Dum mala commisi, Dominum peccator amisi,

Redde, quod amisi, pia virgo, decor paradisi.

Peccavi temere, precanti, virgo, medere
20. Ac animae miserae miserere, precor, miserere.

Tu thronus es Christi, dignissima namque fuisti

Esse parens isti, quem virgo manens peperisti.

Ergo, Dei cella, serpentis deprime bella,

Pande tuis, stella, solem, materque puella.
25. Alma parens Christi, quae virgo manens peperisti,
Deprecor, exaudi, mea mens quae postulat, audi.