75. Oratio ad beatam Mariam V.

1. Gloriosa mater Dei,
Memor esto semper mei,
Mei semper esto memor,
Quem peccati terret amor.

2. Quae ad dicta Gabrielis,
Paranymphi tam fidelis,
In auditu oboedisti,
Quando Christum concepisti,

3. Verbum illud, verbum Dei,
Per quod salvarentur rei.
Audi, virgo, verba mea,
Spes et salus, vita mea.

4. Audi vota supplicantis
Te devote reclamantis;
Audi, inquam, paenitentem,
Prae peccatis iam foetentem.

5. Pro peccati nam sentina
Instat mea iam ruina,
Sis ruenti medicina,
Assis, clemens o regina.

G. Ab aetate puerili,

Et, quae fervet, iuvenili
Incentivo velle tremor,
Criminali mole premor.

7. Haec est via peccatorum
Et voluptas vitiorum,
Quae ad portas ducit mortis
Me sub huius rosa sortis.

8. Instat serpens inimicus
Ille fallax et antiquus,
Qui me quaerit absorbere
Et absorptum retinere.

9. Sed tu, stella maris pia,
Peccatorum spes, Maria,
Flos et odor beatorum
Super choros angelorum,

10. Munda, quaeso, criminali
Me squalentem sorde mali
Dignitate speciali,
Qua fulges sic, virginali.

ll.Age, precor, age, sancta,
Quia vides, mala quanta
Nunc invadunt corpus meum,
Super omni reo reum.

12. Conculcatum hostis planta
De draconis fauce tanta
Libera me, mater Dei,
Hora mortis et diei.

13. Fac me Deo vas pudicum,
Vastransgressum perantiquum
Seductorem inimicum,
Ne me trahat in Avernum.

14. Pietate, qua redundas,
Lacrimarum flentis undas,
Virgo, cura sic discerni,
Ne me claudat os inferni.

15. Non despero de salute,
Licet mea iuventute
Mea fuit semper vita
Vitiorum mole trita,

16. Si ob tuam genetricem
Animam vis peccatricem
Exaudire, pie Deus,
Qui compungor culpae reus.

17. Nam si fides adprobatur,
Quies sacra praedicatur,
Est insanus christianus,
Qui non credit, quia manus

18. Dei clemens est et praesto,
Si contritus corde maesto
Interpellat pietatem
Per Mariae dignitatem.

19. Quia multis argumentis
Licet horis et momentis
Sacra docet nos scriptura
Paenitentis semper cura

20. Ad exemplar creatorum
Dominator angelorum
Ostendit se ipsum Deum,
Non condemnans statim reum.

21. Nam qui Petrum se negantem
Non despexit lacrimantem,
Non despexit, sed respexit,
Cum se reum flens detexit,

22. Et latroni pro Memento,
Quod clamavit in momento,
Dedit locum paradisi,
Mea culpa quem amisi,

23. Heu, mihi nisi Deus

Reddat illum, pater meus,
Et Mariae Magdalenae,
Delictorum labe plenae,

24. Omne crimen condonavit,
Quando pedes eius lavit,
Quas rorarat infimarum
Pio rore lacrimarum.

25. Nunc tergebat, nunc rigabat,
Veniam sic postulabat,
Cum sub mensa pharisaei
Degustaret verba Dei.

26. Ubi Deus phariseo,
Pharisaeus quidem Deo,
Deus autem ut benignus,
Pharisaeus ut malignus,

27. De submissa peccatrice
Concertabant versa vice.
Nostrae actor bonitatis,
Radix tantae caritatis,

28. Sibi clemens indulgebat,
Cum peccasse paenitebat.
Ad hoc ergo, rex, exemplum,
Pietatis fons et templum,

29. Quem adoro, quem imploro,
Omni laude quem honoro,
Cui pronus genuflecto,
Cui totum me committo.

30. Dele meam pravitatem
Per maternam pietatem
Atque ultra publicanum
Ingementem christianum

31. Ab hostili laesione
Et a mortis regione,
Qui peccanti misereris,
Liberare me digneris.

32. Miserere mei, Deus,

Tot malorum qui sum reus,
Adonai Iesu Christe,
Ad te clamat miser iste:

Ad te clamat timor meus,
Miserere mei, Deus.