53. De beata Maria V.

l a. Dulci voto, laeta fide
Festo mentis cor arride,

1b. Suavis soni vox sapore
Epuletur et dulcore.

2 a. Laudum melos citbarizet,
Risu mentis cor hymnizet
In concentus iubilo,

2 b. Flores mentis vox peroret,
Cordis auster os irroret
Flatu rigans nubilo.

3 a. Cordis clamor solvat ora,
Et erumpens vox sonora
Aurem melle compluat,

3 b. Et exclamans mens canora
Ab interna cordis hora
Laudis horas induat.

4 a. Mentis hiems et algores
Cordis [luctus] et languores
Cedant et tristitiae.

4b. Cordis aestas det vigores,
Et ver mentis alat flores
In risu laetitiae.

5 a. Sensus laudis in feturam
Floreat,
Virginalem genituram
Proferat.

5 b. Vagientes belli iura
Dimicant,
Clara fides et natura
Litigant.

6 a. Hic in partu castam videt,
Virginalem hic deridet
In parente flosculum,

6 b. Hic expulsa mentis lite
Virgo, matris nomen mite
Pacis tenent osculum.

7 a. Artem fides superavit
Et humanam proculcavit
Rationis meritum,

7 b. Vis occurrit hic naturae,
Nam divino fracto iure
Suum flet interitum.

8 a. Huius partus in censura
Silet ergo ratio,
Tacent leges, cadunt iura,
Logicae probatio,

8 b. Nec rhethoricae pictura
In ornatu proficit,
Argumenti vis impura
Citra metam deficit.

9 a. Exceptatam iuris formam
Virgo mater recipit,
Dum in prole partus normam
Et naturam decipit.

9 b. Sensualis hic anhela
Latet inquisitio,
Quomodo fit haec quaerela,
Deficit editio.

10 a. O rosae flos,
Quam caeli ros

Tam mire irrigavit,
In fructum fecundavit.

10b. O vitae dos,
Qua felix mos
Te praeglorificavit,
In partu decoravit.

11 a. O vas divini numinis,
Quae solem veri numinio
In orbem produxisti,

11b. O Gedeonis area,
Rore Dei nectarea,
Quem virgo genuisti.

12 a. Tu virga Iesse florida

Per rubum praesignata,
Tu cella Dei rorida
De David stirpe nata.

12b. Tu turea, purpurea,

Tu pudor virginalis,
Tu gemmea, pampinea,
Tu decor festivalis.

13 a. O vernalis,

Dulcedo sensualis,

13 b. O lustralis,

O spes fiducialis.

14 a. O flagrantia,

Spiraculum odoris,

14 b. O praestantia,

Signaculum pudoris.

15 a. Empyrea, siderea,

Vestibulum decoris,

15 b. Tu stellea, tu mellea,
Latibulum fervoris.

16 a. Amabilis, orabilis,

Tu mitis consolatrix,
Tu pacis mediatrix.

16 b. O vera pax, ignita fax,
O veniae donatrix,
Humilium salvatrix.

17 a. Tu thymiama gloriae,
Tu murra festivalis,
Tu cinnamomum gratiae.
Tu nardus genialis.

17 b. Tu cinnamum fragrantiae,
Tu balsamus vitalis,
Tu sapor odorabilis,
Tu odor olivalis.

18 a. Dulcis amor nuptialis
Et amplexus tu legalis,
Formae decor matronalis,
O mentalis levitas.

18 b. Dulcor cordis tu nativus,
De quo fonte rubor vivus
Prodit, tu salutis rivus,
O veris amoenitas.

19 a. O diescens per inane

Caeli fulgor, rubrum mane,
Cordis nubes et profanae
Mentis umbras abige,

19 b. Ut in corde te vidente
Moto voto, mente flente
Lamentemur et intente
Locum demus veniae.

20 a. Salve, veris flos decorans,
Favus stillans ac dulcorans,
Liquor caeli melle rorans,
Praedulcis securitas.

20 b. Ave, gemma candidata,
Tu crystallus inaurata,
Labe milia deflorata,
Semper florens puritas.

21a. Matutina lux rubescens
Et aurora refulgescens,
De qua mundo sol ignescens,
Deus homo prodiit:

21b. Fulgor noctis tu lunaris
Et in luce lux solaris,
Solem mundo stella paris,
Per te salus rediit.

22 a. Auri prima redit aetas
Et decursas quaerit metas,
Hanc, virgo, reciprocas;

22 b. Per te sidus ioviale

Mundo praebet se pacale,
Tu austerum revocas.

23 a. O in matre permansura,
Nulla sua perdens iura,
Augusta virginitas ;

23 b. Rosa florens in rubore,
Flos humescens vivo rore,
Quem rigavit trinitas.

24 a. Virga Iesse te vitalis,
Fructu, flore genialis,
Res quondam prodigialis
Praesignavit typice.

24 b. Nam per florem figurans,
Virgo mater appellaris,
Cum in fructum complantaris
Per Ave mirifice.

25 a. Ave, verbum actuale,
Sempiterna laude vale,
Tu conclave virginale
Regi regum fecunditas.

25 b. O miranda partus iura,
O quam digna, o quam pura,
Quam miratur et natura
Et sensus profunditas.

26 a. Hic altiloqui Platonis
Sensus hebet, Ciceronis
Et vox Publii Maronis
In loquendo deficit.

26 b. Nulla prosunt artis tela,
Nihil agit hic loquela,
Sed arcana Dei vela
Sola fides perspicit.

27 a. Novum opus geniturae
Sibi sumit opifex,

27 b. Artem fallit hic naturae
Ipse summus artifex.

28 a. O digna credulitas !

28 b. O credenda dignitas!

29 a. Res probanda, mira iura,
Quod humana sub figura
Deus homo latuit,

29 b. Quod sub alga rosa luxit,
Gemmam lutum quod obduxit,
Quae non minus patuit.

30 a. Caelum terrae se conclinat,
Petra caeli mel propinat,
Umbra soli iungitur,

30 b. Cedrus latet sub hysopo,
Lux in fumo, tali tropo
Terra caelo fungitur.

31a. O scintillans lux in caelo,
Non caligans umbrae velo,
Omni puro purior ;

31b. Planta rore tu imbuta,
Imbre Dei tu perluta,
Secura securior.

32 a. Vena fontis expers limi,
Rosa rubens, vigor thymi,
Tu cella vinaria,

32b. Quae distillas caeli rorem,
Dei nectar et liquorem,
Plena laude varia.

66 a. Planta dulcis adoptiva,

Fructu, flore, fronde viva,
Fel antiquum et nociva
Primae stirpi temperas.

33 b. Nata patrem, parens natum,
Homo Deum humanatum,
Ante tempus generatum
Virgo manens generas.

34 a. Deum paris, virgo pura,
Ut praedixit in figura
Isaias primitus.

34b. Salve, decus virginale,
Te signavit figurale
Vellus madens caelitus.

35 a. Flos pudoris non marcescit,
Quem post partum bruma nes-
cit
Et humana vanitas,

35 b. Sed qui fuit, idem manet,
Nec excessus aestu canet,
Prima manet sanctitas.

36 a. Florens hortus et conclusus,
Dulcis fructus gerens usus,
Fons signatus,
Vitae status,
Tu oliva germinans.

36 b. Mitis, decens, elimata,
Igne Dei tu flammata,
Purpurata,
Sublimata,
Evae cladem terminaus.

37 a. Tu frondosa tilia,
Dans umbracla milia,
Fonte vivo rigua;

37 b. Eia, virgo decorata,

Fronte, genis, ore grata,
Tu Deo contigua.

38 a. Tu Dei sacrarium,
Noctis luminarium,
Tu illustris claritas,
Tu veris hilaritas,
Lux soli contermina.

38 b. Tu rosa candidula,
Austro caeli stridula,
Cuius rorans folium
Vile nescit lolium
Et sinistra germina.

39 a. Tu post ventos hiemantes
Aestiva serenitas,

39 b. Post procellas fluctuantes
Tu pacis amoenitas.

40 a. O sub umbra grata quies,
Fontana viriditas,

40 b. Vernans radiosa dies,
Fervoris algiditas.

41 a. Tu fervoris aestuosi
Opacans temperies,

41b. Mundi salus ruinosi,

Post maerorem requies.

42 a. Flante terris aquilone
Tu lenis caliditas,

42 b. Cum sol ardet in leone,
Tu grata frigiditas.

43 a. Odor floris, flos odoris,
Dulcis odoramine,

43 b. Flos in rore, ros in flore,
Vernans Austri flamine.

44 a. Ave, rosa vigorosa,
Tu columna pietatis
Et alumna deitatis,
Tu candoris lilium.

44 b. O si mentem vox sequatur,
Si per linguam constringatur,
Quod cor intus meditatur,
O mater humilium.

45 a. Quos ad ortum tuae laudis
Mundi dulcor suae fraudis
In occasu nubilat,

45 b. Duc in pacis orientem
Post terrarum occidentem.
Ubi vita iubilat.

46 a. Quos adversans caro laedit
Et ferrugo criminis,

46 b. Quos ab horto culpa cedit
Paradisi liminis.

47 a. Laudem tibi mens progignit,
Amor nutrit et insignit,
Quae vox extra parturit.

47 b. Quod concepit mens tetosa,
Foris lingua dulci prosa
Loquens melos scaturit.

48 a. Tu naturae suavitas,
Auctorum felicitas,
Dulcis morum gravitas.

48 b. Regalis humilitas,
Tu dulcis moralitas,
Viva sensualitas.

49 a. O solamen, temperamen
Gratiae,

49 b. Tu medela et tutela
Veniae.

50 a. Aura caeli flatu lenis,
Siccis plue cordis venis
Vigorem germincum,

50b. Mundi vanos tolle flores,
Labyrinthum et errores,
Tu decus virgineum.

51 a. Casta, decens, fructuosa,
Tua prole gloriosa,
Pia mater generosa,
Da salutis praemium;

51b. Virga veris genetiva,
Imperatrix caeli diva,
Plue tuis donativa,

Pandens opis gremium.

52 a. Nominosa caeli dea,
Dei mater et idea,
Caeli clara lumine,

52 b. Radix vento, rore lento,
Madidata, fecundata,
Plena Dei numine.

53 a. Acb,quissapor,quamsaporas,
Qualis vapor, quam vaporas,
Irrigamen gratiae,

53 b. Decor formae puellaris,
Decens pudor tu sponsalis,
Clara rubens facie.

54 a. Uva mellis, plena rore,
Ventilata rosae more,
Ubertatis satio,

54 b. Stella maris, favi stilla,
Fluctuantes nos tranquilla,
Portuosa statio.

55 a. Duc ad litus nos de ventis,
Lux serenans diem mentis,
Convivatrix animae,

55 b. Eia, veris temperamen,
Leni corda dans spiramen
Et decus magnanime.

56 a. Ave, decens et festiva,
Semper felix et votiva,
Melos te glorificet:

56 b. Laus sit tibi, Deo grata,

Cuius parens es et nata,

Mundus te magnificet.

56 c. Cordis fonte, da, promanans
Rivus, carnis morbum sanans,
Animam vivificet.

57 a. Eia, precum imbre natum
Redde mitem et placatum,
Virgo, lex emphatica,

57 b. Iuventutis nostrao ratem
Duc per mundi tempestatem,
O mater probatica.

58 a. Arce remo castitatis
Nos ab esu vanitatis
Et caenosis fluctibus,

8 b. Redde portum vitae sanctae,
Vento caeli nos perflante
Duc de mundi luctibus.

59 a. Oris candor spondens risum,
Te videntis pascens visum,
Serenatrix cordium,

59b. Tu aurora, mentis risus,
Vernans cordis paradisus,
Salutis exordium.

60 a. Cibus cordis epulantis,

Nectar mentis iucundantis,
Quod decorem procreat,

60 b. Da inundans fletus rivo
Cordis vultus te votivo
Plangore demulceat.

61a. Dei nata, natum roga,

Ut nos pressos carnis toga
Veste caeli poliat,

61b. Quos Dione dulci felle
Et fellito luxus melle
Visu mentis spoliat.

62 a. Algescentes crimine
Nos dulci nutrimine
In salutem corrige,

62 b. Anxiatos onere

Da mundana ponere,
Fessis opem porrige.

63 a. Pravis subveni,

Abigail virtutis,

63 b. Regis iram praeveni
Precibus virtutis.

64 a. Vera Iahel gloriae,
Sisaram pertunde

64 b. Et clavo victoriae

Spem tuis refunde.

65 a. Novae Iudith gratiae
Nos ab Holoferne

65 b. Salves, hostem animae
Gladio prosterne.

66 a. Nos in fine, virgo, nosce,
Sanctum manna nobis posce,
Dulcem alimoniam,

66b. Ne qui fluctu nunc iactamur,
Tunc infernae patiamur
Luis acrimoniam.

67 a. Nos in mortis agonia,
Caeli dea, vitae via,
Luctantes non deseras,

67 b. Post mundi calamitosa
Caeli semper radiosa
Da, quae caelum reseras.

68 a. O quae mentem Dei sentis
Et in libro Dei mentis
Cursus mundi prospicis,

68 b. O quae vides vitae metas,

Tam futuras quam impletas,

Tu quae noym conspicis.

69 a. Tolle mitis variam
Poenam carcerariam,
Nec gementes despice,

69 b. Luctuosum, labilem,
Mundum inamabilem
Pio vultu respice.

70 a. Tu, regina, caeli domo

Nunc elata, quondam homo
In delicti nostri pomo,
Summo regno fungeris.

70 b. Nos in pomo culpa stravit,
Casus noster te beavit
Et in regnum sublimavit,
Ubi Deo iungeris.

71a. Ergo iura pietatis

Redde, mater, tuis natis,
Labe carnis infuscatis,
Sic te matrem induis.

71b. Tuos natos dissentire

Per quemcunque motum irae
Si concedis, potes scire,
Quod te matrem exuis.

72 a. Turris David clippeata,
Labe nulla superata,
Neque flamma devastata
Nec carnis incendio,

72 b. Da, praelata caeli thronis,
Ne tyrannus rationis
Placans felle laesionis
Et tristi dispendio,

73 a. Amor carnis intestator,
Castitatis expugnator,
Visum mentis debriet,

73 b. Ne iuventae sensus hebens
Et iocorum dona praebens
Male cor inebriet.

74 a. Da,quod luctum risus [pendat],
Quod timorem spes defendat,
Desperare prohibe,

74b. Quod primaevamenssenescat,
Quod a labe cor desuescat,
Carnis iura prohibe.

75 a. Ne vitandum auris bibat,
Nec os animam proscribat
In infando famine,

75b. Stultum visus ne venetur,
Nullo vili superetur
Naris odoramine.

76 a. Nos in cymba pietatis
Et in transtro sanctitatis
Per fluctus humanitatis
[Duc ad portum deitatis]
Post haec transitoria,

76 b. Post iacturas tempestatum
Portum caeli redde gratum ;
Posce nobis sanctum pneuma,
Ut per laetum te celeuma
Canamus in gloria.