26. De beata Maria Virgine.

Ave, porta poli, noli te claudere mota,
Vota tibi grata data suscipe, dirige mentem
Entem sinceram, veram non terreat ater,
Mater virtutum, scutum, via, semita clara,
5. Ara Dei, per te certe datur hostia vitae,
Rite deflenti genti fert gaudia mira,
Iraque cessatur, datur et pax, carmina laudis
Audis, non spernis, cernis, pia, labe gravatos,
Gratos hosque Deo, leo ne voret, efficis ; aegis,

10. Regis stirpe sata, data nobis, sis pia fautrix,
Auctrix mercedis, caedis regem tenebrarum,
Clarum vas mellis, fellis sine crimine pura,
Iura foves plene, lene luces frangis et hastas,
Astas turbatis, statis offers te fore matrem,

15. Patrem redde pium, dium per saecula numen,
Lumen adoptatum, gratum das, quod tibi saeva
Eva tulit temere, vere reddis, trabeata,
Nata David regis, legis lux, thema suave,
Ave, tuos rape tu fletu, rege, virgo benigna,

20. Digna Dei nutrix, tutrix orbis tibi nomen,

Omen in aede, bonum donum, dos larga modestis.
Maestis succurris, turris salvans bona cuncta,
Iuncta Deo gaudes, laudes tribuat tibi tota
Nota cohors cleri ; mihi redoles quasi myrtus,

25. Virtus es morum, florum flos, regia cella,

Stella, Maria, maris, paris hunc, qui te tibi fecit,
Te scit ab aeterno verno de stipite Iesse
Esse rosam puram, curam gere termino faecis,
Caecis recta via, pia mundo, nosque guberna,

30. Verna poli, soli, portat quod trinus et unus,
Munus ; ave suave misit tibi digna puella,
Bella remota facis, pacis tu foedera praestas,
Estas iam flores, flores ut murraque Tempe,
Nempe veni, leni zephyrus [cum] flamine ventus,

35. En, tus, formosa rosa, sacra veni, veneranda,
Danda tibi dona bona suscipe mille, propinqua,
In qua [turtur] avis suavis vocem dat aperte,
Certe sponsa, soror, moror, assis, surge, columba,
Tumba referta rosis, dosis es, regina, monarcha,

40. Arca novae legis, tegis intus manna salutis,
Tu tis nos ducis, lucis civitas, ad amoena.
Vena fluentis aquae da, quae sunt gaudia, tristi,
Isti gaudia fer, vafer resistat ut hosti.
Nosti, grata Deo, fleo, sim sine perpete fletu,

45. Me tu solare, mare placa, noxia munda,
Undaque me volvat, solvat tua gratia mites,
Lites complanans, sanans das pocula vitae.
I, te sponsus amat, clamat, conscende, capescas
Escas sanctorum, quorum medio dominaris.

50. Raris caelestes vestes variis cape signis,
Ignis amor dius pius ex te lucet, amanda,
Blanda sunt alloquia, quia lumine lucis amicta.
Victa morte tua sua regna tibi dat in aevum,
Saevum qui pressit gessitque crucem sibi tergo.

55. Ergo fine sine tegit et regit omnia nutu.
Tutu dulcis ita sita praefers ubera vino,
Bino cum fructu luctu cor dirige maestum.
Estum tu releva, leva, dextraque det, decet hoc te,
Nocte die sequi te qui vult, prodiga vera

60. Era sibi pandis, scandis quasi virgula fumi,
Dumi te signum dignum designat opimam.
Imam te rexit, vexit super aethera Iesus,
Caesus verberibus, cibus angelicus, speciali
Tali nos recrea, dea caeli, nectare, mitis

65. Vitis, nos pota, nota virga, quam tulit Aaron,
Saron tu decor es, mores nostros rege, iacta

Pacta nefanda retro, taetro ne laedar ab hoste.
Ros te sacravit, pavit te pneuma beatum,
Vatum materia, tria regem munera laudant.

70. Claudant os stulti fulti falsique sophistae,
Triste cor horum, quorum sunt ista superba
Verba: paris maris ex tactu seu semine prolem,
Solem caelestem; pestem tu pelle potenter.
Venter clausus erat sacer, at nunc integra quaeque

75. Eque, virginitas, ditas nos rore suavi,

Navi iam mersae, versae da prospera vota.
Tota puellaris, paris inscia, protege clerum,
Rerum servatrix, datrix veniae, mala punge,
Iunge coronatis gratis nos hos, era digna.

80. Signa qui poscunt, noscunt te, sic quoque sume
Tu me, Maria pia, protege [tu] meque tuere.
Vere Praepositus, situs in Glogav Ioha scripsi,
Ipsi salvamen mihi praesta caelitus. Amen.