102. De beata Maria V.

1. O Maria, mater Christi,
Sola Christo placuisti,
Sola digna tu fuisti
Ferre mundi pretium.

2. Felix venter, qui portavit,
Felix virgo, quae lactavit,
Felix mater, quae gestavit
Summi patris filium.

3. Ad te, virgo, manus tendo,
Me peccasse reprehendo,
Fundo preces ad te flendo,
Ut sis in auxilium.

4. Peccatoribus teneris

Opem ferre; cur? si quaeris,
Audi quare, si digneris,
Castitatis lilium.
5. Quia verbum, incarnatum
Propter hominis peccatum,
Tibi confert principatum
Caelestium, terrestrium.

6. Eia, mater [illibata]
[Eia nostra] advocata
Redemptori Christo grata,
Respice suspirium.

7. Funde preces, placa Deum,
A peccatis solve reum,
Nil negabit, quidquid eum
Rogas, non est dubium.
8. Dum precaris salvatorem,
Iram vertit in amorem
Et convertit peccatorem
Et praestat subsidium.

9. A te ergo non recedo,
Vita nostra, spes, dulcedo,
Per te me salvandum credo,
Vera spes credentium.