128. De beata Maria V.

1. Pulchra totaque amica
Regis angelorum,
Virgo pulchra et pudica,
Claritas polorum.

2. Intus pulchra, pulchra foris
Vere comprobaris,
Veneranda cunctis horis
Mater expers maris.

3. Intus pulchrioribus
Ornaris virtutibus
Et decentioribus

Foris polles moribus.
4. A verticis caesarie

Usque imum plantae
Tu es sine carie
Deo te servante.
5. Nulla virtus est, quae posset
Cor tuum transscendere,
Immo cunctas tibi nosti
Virtutes attrahere,
6. Quibus Deo placuisti
Et choris caelestibus,
Quibus mundo profuisti
Perplexo maeroribus.
7. Evae prolem denigratam
Peccati fuligine
Caeli regi reddis gratam
Tua pulchritudine.

8. Summa virtus te virtutem
In terris constituit,
Tibi iungi et te fungi
Cui summe placuit.

9. Unde virtus de supernis
Te virtutem adiit,
Ut humanum genus sanum
Fieret, quod periit.
10. Iunctus factor est facturae
Iunctus Deus homini,
Venerandus omni iure
Iunctus partus virgini.
11. Iuncta virtus est virtuti,
Decor pulchritudini,
Iuncta salus est saluti
Et dulcor dulcedini.
12. Deus hominem creavit
Ad suam imaginem,
Ad cuius in te formavit
Se similitudinem.

13. Tu es paradiso
Tanto dignior,
Quanto tuus fructus
Est utilior.

14. O quam pulchra tu fuisti,
Cum sit factus vultus Christi

Tibi matri similis,
Cui tu es voluntate,
Caritate, pietate

Facta non dissimilis.

15. Si te Deus non vidisset
Creaturam optimam,
In matrem non elegisset
Te sibi carissimam.

16. Ergo, virgo pulchra tota,
Nos viles non despice,
Sed a quavis mendae nota
Nos mundari perfice.

17. Fac ut tuo placeamus
Praedilecto filio
Et felices transeamus
A mortis exsilio.

18. Solis, lunae vel stellarum
Splendor parum cernitur
Sive virtus planetarum,
Plene dum attenditur,

19. Quanta dignae matris Christi
Fulget virtuositas,
Quam prae cunctis Dei patris
Illustravit claritas.

20. Cristallinum vel stellatum
Caelum vel empyreum
Caelum Deo non est gratum
Magis quam hospitium

21. Ventris casti, quo celasti
Iesum Dei filium;
Hunc in mundo, virgo pia,
Nobis fac propitium.