114. De beata Maria V.

1. O mater, virgo virginum,
Tu castitatis lilium,
Trinitatis triclinium,
Vitam tulisti omnium,
O mater, virgo virginum.

2. Maria, fons paradisi,

Lignum vitae, quod quaesivi,
Per te mundus refloruit,
Dum Deum per te coluit.

3. Tu nomen Evae flebitis
Mutasti, virgo nobilis,
Adae demis interitum,
Quem mundus sensit meritum,
O mater virgo virginum.

4. Te Moyses et Aaron
Praesignant, filia Sion,
Rubus ardet et non aret,
Virgo florens est et aret.

5. Virgo fecunda filio
Viro caret in saeculo,
Gedeonis mysterium
Tibi parat imperium.

6. Per te David opilio
Regni sedet in solio,
Te Salomon in ferculo
Throno signat eburneo.

7. Hoc opus est tam nobile,
Quod non sit ei simile,
Cuncta per te pacificat
Et universis imperat,
Dum te pater a saeculo
Thronum elegit filio.

8. Tu propitatio

Es in templo Dei,
Salutis responsio
A te datur ei,
O memento mei.

9. Tu candelabrum,

mensa panis vitae;
Defecti ieiunio,
Omnes advenite
Ob amorem vitae.

10. Fons indeficientiae,
Tu rivus affluentiae,

Quae nulli das invita,
Hortus clausus et signatus,
Flore, fructu amoenatus,

Ab homine nec scita.

11. Per filium imperium
Mater tenens aethereum,
Secum disponens omnia,
Certus sum, quod sit ita.

12. Virginale speculum,

Per quod lucet saeculum,
Castitatis lilium,
Amoenitas florum
Et dulcedo morum.

13. Thalamus munditiae,
Thronus sapientiae,
Eia, quo rex gloriae
Christus sedet hodie.

14. Mira genitura,
Paret virgo pura
Dei patris filium,
In quo vita omnium,
Omnis creatura,
O virgo, me cura.

15. O mirum matris meritum,
Servum dum facit dominum,
Deum nostrum ac Dominum,
Dum imus fit omnium
Summitas summorum.

16. O mira humilitas,
Cui nulla vilitas,

Vilis est hominibus,
Per Mariam virginem

Nobilis nobilibus
Colla superborum
Calcans impiorum,
O donum donorum.

17. Stella maris praevia,
Salvos nos duc per devia
Ad vitae introitum
Et meritum habentium
Consortes fac iustorum.

18. Imperatrix omnium,
Regni tenens solium,
Tu cura sceptro radias,
Tu principatum habeas
Regni caelorum,
Tu es laus angelorum.

19. Tu caelestis dulcedo,
Tu mater es amoris,
Virginitas, fecunditas,
Omnis expers doloris.
20. Tu civitas, festivitas,
In te boni sacietas,
Amplexus filialis,
Te recreat laetitia,
Tu mater curialis.

21. Nato iungis felicia
Ora cum amicitia,
O, quis audivit talia.
22. Radix immortalitatis,
Flos deliciositatis,

Sanctitatis fructus,
Dulce lignum, dulci dignum
Melodia quidem, quia
Vitam mundo portasti,
Mater filia.
23. Thronus regis, arca legis,
Botrus Cypri, spica nardi,
Odor suavitatis.

24. Tu balsamus, tu calamus,
Te decet regis thalamus,
Tu es Hesther pulcherrima,
Tu es Iudith fortissima,
Tu hostem mundi conteris,
Populum tuum eripis,
Virtus tua notissima.

25. Tu civitas iustitiae,
Voce plena laetitiae,
Te magni laudant carmine,
Te parvae canunt animae.

26. Mater misericordiae,
Tu tua pascis specie
Dilectum in meridie,
Tu fontem sapientiae,
O singularis gratiae
Hauris, mater clementiae.

27. Ex Aegypto, o Maria,
Hostis te duce pereat,
Virtus tua nos provehat
Ad manna nos promoveat,
Cibum carnis amoveat.

28. Tu nos post hoc exsilium,
Mater, transfer ad filium,
De terra nos lugentium
Redde terrae viventium.

29. Tu potes haec et omnia,
Regis mater et filia.
O novitatum novitas,
Tua regnat humilitas,
Tibi sit laus per filium,
O mater, virgo virginum.