117. De beata Maria V.

O quam pulchra polo residere Maria probaris,
Quae tam pulchra solo manibus depicta pararis,
Digna coli regina poli, paradisus amoenans,
Sol celebris, lux in tenebris, tenebrosa serenans,

5. Hymnidicus chorus angelicus famulans tibi plaudit,
Magnificus rex pacificus, quidquid petis, audit.
Tu requies, species, saties et manna decoris,
Nutrix, adiutrix, tutrix in agone laboris.
Libanus et platanus, clibanus per flamen amoris,

10. Balsamus et thalamus, calamus, spiramen odoris.
Tu rosa, tu lilium, crystallus, ebur, therebintus,
Chrysolithi pretium superans, pretiosa iacinthus.
Stella decoris, cella pudoris, mater honoris,
Stilla liquoris, gemma valoris, lima doloris,

15. Summe decor, te corde precor, demissus in aequor,
Mente necor, te, virgo, sequor, languentibus aequor.
Ad veniam veniae venio, veniam mihi quaero,
Ad portum patriae te remige pergere spero.
Stella maris, tu sola maris sine semine natum,

20. Yirgo, paris sine more paris sine semine natum.
Mentes illustra nostras, o vera lucerna,
Nam sine te frustra quaeruntur regna superna.
Ecce, Maria, tibi miser obtulit hoc modulamen,
Tu tamen esto sibi tutamen in omnibus. Amen.