139. De beata Maria V.

1. Salve, plena caritate,
Singulari pietate,
Speciali dignitate,

Tuam laudem perficit
Tuus Iesus, rex caelorum,
Qui in cella pigmentorum
Te malorum granatorum

Plene musto reficit.
2. Virgo mater, gratulare,
Tuum Iesum osculare
Et in eius delectare

Beatis amplexibus ;
Dignum enim est et iustum,
Dei plenum habens gustum,
Ut amoris bibas mustum

Prae cunctis amantibus.

3. Angelica hierarchia
Iugi laudat harmonia
Te beatam, cuius tria

Probant privilegia,
Quod tu, virgo mater Dei,
Summae thronum requiei,
Curam matris habens, ei

Conregnas in gloria.
4. Quae es thronus tuae prolis,
A terreni fisco molis
Nos solutos infer polis

Materna potentia,
Ubi bona videamus
Sempiterna, quae speramus,
In pace Dei vivamus

Inter Sion brachia.