27. De beata Maria V.

I.

1. Ave, regina caelorum,
Clarum iubar supernorum,
Mater Dei, virgo vera,
Pia, mitis et sincera.

2. Virgo Dei, Deo digna,
Nato prece me consigna,
Preces audi, praesta votum,
Cor in bono fac immotum.

3. Dona mihi cor contritum,
Rege visum et auditum,
Atque gustum et olfactum,
Dulcis mater, rege tactum.

4. Ut in cunctis te regente
Vivam Deo pura mente
In consortio sanctorum
In saecula saeculorum.

II.

1. Ave, virgo columbina,
Babylonis de sentina
Mihi tutum da ducatum,
Plasmatorem fac placatum.

2. Esto mihi consolatrix,
Pro me sis interpellatrix,
Pro me natum interpella,
Salva mortis de procella.

3. Superare fac me mundum,
Ne demergat me profundum.
Ne me sinas naufragari
In peccatis in hoc mari.

4. Potens in conspectu Dei,
Memor esto, precor, mei,
Memor esto supplicantis,
Audi preces lacrimantis.

III.

1. Ave, sancta, sanctissima,
Omnium beatissima,
Nunc in caelis sublimata,
Esto mihi semper grata

2. Et ab omni malo tutrix,
Pia mater et adiutrix,
Vivendo hic humiliter,
Tandem tecum perenniter.

3. Tuam, precor, pietatem
Et immensam sanctitatem,
Ut in mea paupertate,
Animae fragilitate,

4. Mihi velis subvenire
Et ne sinas me subire
Ulla causa laesionis
Vel perversae suasionis.

5. Heu, in quantis constitutus
Sum peccatis et pollutus,
Foedae faece culpae foedor,
Cerne, quantis, virgo, laedor.

6. Intus, foris culpae spinis,
Fac securum me de minis
Corruentis huius mundi,
Virgo, iuva, ne contundi

7. Ictu sinas me draconis
Infernalis Babylonis,
Sed da locum et ducamen
Ad caeleste regnum. Amen.

IV.

1. Ave, lucis tu aurora,
Esto praesens mortis hora,
Decumbentem fove, leva
Et a morte solve saeva.

2. Ut te duce lucis via
Migrer tecum, o Maria,
Et caelesti fruar dono
Iubilando dulci sono.

3. Laudans Iesum voce digna,
Per quam mira fiunt signa,
Duplex mors me ne infestet,
Natus tuus idem praestet,

4. Tua prece exoratus,
Idem pater qui et natus,
Idem utriusque flamen,
Trinus unus Deus. Amen.

V.

1. Ave, vera humilitas,
Caritas et benignitas,
Tu sol mirae fulgentiae
Et fons supernae gratiae.

2. De caritatis lumine
Libera nos a crimine,
De splendore veri solis
Da gratiam christicolis.

3. Tu pro nobis omni hora
Iesum natum sic exora,
Ut a malo eruamur
Et ad vitam perducamur.

4. A delictis mundi toti,
Sic confessi et devoti
Requiescamus in pace,
Ne damnemur in fornace.

VI.

1. Ave, legis plenitudo,
Sanctorum beatitudo,
Tu actus munda noxios
Et pelle adversarios.

2. Et cum tua familia
Da mihi beneficia,
Ut in morte non pavescam
Neque reus erubescam.

3. Et post hoc exsilium
Possim tuam filium
Contemplari cum beatis
In conspectu deitatis.

VII.

1. Ave, templum Iesu Christi,
Digna tollere fuisti
Miseriarum gemitus,
Dum facta es divinitus

2. Vera mater honestatis
Summaeque benignitatis,
Tu laudanda omni hora,
Adoranda sine mora.

3. Quae das lapsis relevamen
Et infirmis medicamen,
Mihi dona sanitatem
Atque cordis puritatem.

4. Pro me semper intercede,
Ut et caelesti mercede
Ditet Deus cum beatis
Regno suae claritatis.

VIII.

1. Ave, puteus aquarum
Tu omnium gratiarum,
Mihi semper administra
Dona pelleque sinistra.

2. Ecce, ad te confugio,
Virgo, mea salvatio,
Spes salutis et veniae,
Mater misericordiae.

3. Serva ad te fugientem,
Salva in te confidentem,
Tene tibi commendatum,
Leva servum conquassatum.

4. Dono tuae pietatis

Fac, ut solvar a peccatis
Et a poenis, quas merui,
Quibus perpetrando rui.

5. Super omnes te adoro,
Super omnes te imploro,
Tu es enim potentior,
Inter omnes sublimior.

6. Nullus enim confundetur,
Qui te rogat, non perdetur,
Qui se tibi commendabit,
Vere tecum conregnabit.

7. Qui te invocabit pure,
Salvabitur vero iure,
Nomen tuum invocare.
Hoc est opus salutare.

8. Nomen tuum dulce nimis
Memorandum est imprimis,
Ubi nomen tuum sonat,
Spem salutis verae donat.

9. O Maria, mater Dei,
Miserere semper mei,
Tolle a me hic peccatum,
Quidquid male perpetratum.

10. Per te vere me salvari
Credo atque reparari,
Ergo pro me roga Deum,
Ut absolvat suum reum.

11. Exaudi me et suscipe
Meque clementer respice
Et visita me miserum,
Oppressum mole scelerum.

12. Nam si tu me visitabis,
Visitando me purgabis,
Tua enim visitatio
Est scelerum ablutio.

13. O domina veneranda
Super omnes et amanda,
Si me velis adiuvare,
Quis me coget desperare?

14. Ille potest desperare,
Qui te non vult invocare.
Tota enim salus nostra
Ex te sola est progressa

IX.

1. Ave, vera salus nostra,
Domans inimici rostra
Atque eius dominium
Per salutis mysterium.

2. Mentem meam tu sic gyra,
Non vincatur ulla ira,
Atque linguam sic refraena
Ne sit verbis ea plena.

3. Ut proferat per te verba,
Non tamen mente superba,
Ecce, me tibi commendo,
Guberna, rege tuendo.

4. Per te, precor, sim purgati
Nec plus peccare paratus,
Tandem sic valeam sisti
Deo, quem tu genuisti.

5. O domina gloriosa,
Super omnes speciosa,
Tutricem tu mihi da te,
Quaeso, ut protegar a te.

6. Assis mihi supplicanti
Et te saepe invocanti,
Hoc mihi solum dignare
Te et natum adamare.

7. O virgo nobilissima,
Dulcissima, dignissima,
Fac me digne te laudare,
Tecum semper habitare.

8. Tu omnium dignissima
Et virginum castissima,
Fac me digne confessorum
Et virginum tenere chorum.

9. O domina Deo cara,

Stirpe decens ac praeclara,
Sed meritis praeclarior
Moribusque nobilior,

10. Mihi omnia damnosa
Pelle, virgo generosa,
Tuis meritis praeclaris
Me salva, o stella maris.

11. O domina gratissima,
Virtutibus dignissima,
Omni bono tu fecunda,
Quod nulli es hinc secunda.

12. Virgo semper, ante partum
Et in partu et post partum,
Iure cunctis es praelata,
Super omnes exaltata.

13. Semper casta, semper pura,
Semper Deo placitura,
Nunquamlevis, nunquam vana,
Ac si esses inhumana.

14. Dona mihi hic sincere
Deum iugiter timere,
Ut cum venerit Messias,
Me ducat ad melodias.

X.

1. O domina dominarum,
Tu regina reginarum,
Propter tuam dignitatem
Et meam malignitatem

2. Pravitatem cordis pelle,
Quod abundat omni felle.
Ego pauper et egenus
Et a Deo alienus

3. Adversum me irritavi
Deum meum, dum peccavi,
Quem tu mihi pacifica,
Dei mater et unica.

4. Ut in eius maiestate
Regar tua bonitate
Et valeam tecum vere
Caelum in aevum retinere.

5. Hoc te posse impetrare
Credo firmiter et clare,
Quapropter haec mihi dona,
Sola spes atque patrona.

6. O Maria, flos virginum,
Ora pro me ad Dominum,
Ut ad caeli palatia
Perveniam te praevia.

7. Fac me sine periculo
Sic migrare de saeculo,
Ut occurens cum angelis
Me suscipias in caelis.

8. Ibi tecum sine fine,
Ubi quies, nullae minae,
In aeternum aeternorum
Id saecula saeculorum.

Xl.

1. O praeclara stella maris,
Quae in aevum gloriaris,
Me ad portum fac venire
Neque sinas me perire.

2. Et perduc me, ubi gratae
Caeli portae reseratae,
Ut coniungar salvatori
Hic in forma meliori.

8. O Maria, lumen vitae,
Fac me audire Venite
Absque ulla gravi fraude.
Sicque vitam meam claude,

4. Tandem tecum contemplari,
Contemplando gratulari
Laudando Deum deorum,
Quem laudant caeli caelorum.

XII.

1. Ave, stella matutina,
Peccatorum medicina,
Mundi princeps et regina
Esto nobis disciplina.

2. Sola virgo digna dici,
Contra tela inimici
Clipeum pone salutis
Tuae titulum virtutis.

3. Tu es enim virga Iesse,
In qua Deus fecit esse
Aaron amygdalum,
Mundi tollens scandalum.

4. Tu es area compluta,
Caelesti rore imbuta,
Sicco tamen vellere;
Tu nos in hoc carcere

5. Consolare propitia,
Dei plena gratia,
O sponsa Dei electa,
Esto nobis via recta

6. Ad aeterna gaudia,
Ubi pax et gloria,
Et nos semper aure pia
Dulcis exaudi Maria.