151. De beata Maria V.

1. Salve, stella marina,
Maria mater lilio,
Nata lucens vicina
Polo mundi filio.
2. Nam Christus punctus stabilis
Est firmamenti spherae.
Hoc est incommutabilis
El et aeternus vere.
3. Quam ambit septistellium
Splendentium sanctorum,
Universitas omnium
Hoc est uranicorum.
4. Ursa maior videlicet,
Cursus denis pluralis,
Quod milibus hic explicet
Infinitum non talis.

5. Haec est, quam conversamine
Unusquisque sectatur
Pro suo mensuramine,
Quo Deo limitatur.
6. Quam et nos per hoc manibus
Velificantes mare
Magnum latumque crebrius
Debemus inspectare,
7. Ne subiugemur fluctibus
Undarum turbulentis,
Devorandi reptilibus
Maris non quiescentis.
8, Quin potius ut lumine
Praeclaro meritorum
Simulque coruscamine
Claro suffragiorum

9. Ac exemplans semitis
Nos introducat sui,
Quo portus pace perpetis
Possimus iuge frui.