23. De beata Maria V.

1. Ave, mater verbi pia,
Virgo dulcis, o Maria,
Mundum ornans verbo tali,
Caelum flore virginali.

2. Ergo triplex hierarchia
Suavi laudat harmonia
Miris te praelatam donis
Cunctis angelorum thronis.

3. Laudo tuum cor sincerum,
Quod sincera fide plenum
Credidit, hoc posse Deum,
Quod excedit nosse meum.

4. Unde rogo, mater mea,
Tu cor mundum in me crea,
Fac habere fidem rectam
Caritatemque perfectam.

5. Laudo ventrem gloriosum,
Qui thesaurum pretiosum,
Praeclarum munimine,
Miro clausit ordine.

6. Haec me beata pondera,
O genetrix christifera,
Fac amore sedulo
Ferre cordis vasculo.

7. Tuum collaudo spiritum,
Qui per dulcem paraclitum
Noto gaudet tripudio
Tuo dilecto filio.

8. Unde, mater laetitiae,
Perfunde risu gloriae
Flentes in hoc exsilio
Tuo felici gaudio.

9. O beati oculi,

Quibus lucem saeculi
Meruisti cernere
Tuo tectam vellere.

10. Ergo, mundi domina.
Meum cor illumina,
Ut in Iesu faciem
Totam figat aciem.

11. Ulnas laudo venerandas
Atque manus adorandas,
Quae gestant Iesum parvulum,
Verbum tractant infantulum.

12. Ipsum, rogo, nutrix pia,
Mihi confer in hac via
Complecti mentaliter,
Tractare fideliter.

13. Os collaudo tenerum,
Quod praedulcem puerum
Osculatur saepius
Et adfatur dulcius.

14. Unde peto, mater Dei,
Puer Iesus cordis mei
Thesaurum possideat,
Et os laude repleat.

15. Laudo beata ubera,
Quibus virgo puerpera
Vagiente Iesulo
Fundis lac puerulo.

16. Ergo precor, o regina,
Te precanti tu propina
Lacrimarum rivulos,
Riga mentis oculos.

17. Aures laudo virginales,
Quibus voces doctrinales
Christi, mater, audiebas
Et in corde conferebas.

18. Ipsas aures nunc inclina,
Virgo, meis precibus,
Tua prece vox divina
Meis sonet auribus.

19. Vultu te laudo virginem,
Ad tuam pulchritudinem
Solis stupescit radius,
Patris occurit filius.

20. Per hunc aspectum floridum
Vultum mentis fac lucidum
In castitatis lilio
Et intellectus radio.

21. Pedes laudo sanctitatis,
Qui fervore caritatis
Agnum sequuntur caelicum,
Novum canentem canticum.

22. Hinc, quaeso, mater virtutis,
Nos columna tuae lucis
Duc per viam iustitiae
Ad statum dulcis patriae.