8. De beata Maria V.

1. Aula vernat virginalis,
Cuius pars est integralis

Tectum, pes et paries,
Iungit haec in unum tria
Trinus unus in Maria,

Iuncti pollet series.

2. Christus petra fundamentum,
Tenax tecti tegumentum

Obumbrator spiritus,
Parietem posse patris
Stipat, ut procellis atris

Obviet oppositus.

3. Parit tectum architectum,
Aula regem, cuius legem

Sua curat curia ;
Rubent rosae speciosae
Fundamento, pavimento

Munda candent lilia.

4. In se formas angulorum
Fert beryllus et decorum

Parietem circuit,
Cum saphyro stat pyropus,
Virginale signans opus

Caritatem innuit.

5. In cortina copulatur
Cocco byssus et artatur

Cum iacintho purpura,
Sol stat fixus in hoc caelo,
Sol in stella, stella velo

Vincit maris murmura.

6. Purpuratur, dum sacratur
Virgo, byssus humilis,
In doctrina stat divina,
Iacintho est similis.

7. Designatur, quod amatur
Et quod amat firmiter,
Cocco tincto qui iacincto
Conubit perenniter.

8. Domus aromatica

Nardo, ture, calamo,
Murra, cedro mystica,
Cinnamomo, balsamo,

9. Funda nos in filio,
In patre suffulcias,
In sancti suffragio
Spiritus operias.