9. De beata Maria V.

1. Ave, caeli domina,

Quae transcendis agmina

Caelestis militiae,
Ave, felix femina,
Stola gaudens gemina

Super thronum gloriae.

2. Surge, surge, propera,
Oliva fructifera,

Tuum fundens oleum,
Tua semper ubera
Mea sanent vulnera,

O iubar aethereum.

3. Tu es virgo sapiens
Et verbo concipiens

Sine viri copula,
Stella solem praeiens,
Lumen indeficiens,

Luna sine macula.

4, Regnans iam in superis
Depelle a miseris

Culpae tu caliginem,
Salus nostri generis,
Culpae nobis veteris

Absterge rubiginem.

5. Nunc te rogo virginem,
Per tuam dulcedinem

Respiret ecclesia,
Cuius pulchritudinem
Atque mansuetudinem

Mirantur caelestia.

6. Eia, fac me iugiter
Devotum et puriter

Te semper diligere,
Dignae et sollicitum
Nunc semperque debitum
Laudis tibi reddere.