41. De beata Maria V.

1. Ave, virgo, verbi mater,
Quam signavit Deus pater

Suo sancto flamine;
Ave, virgo, virga Iesse,
In qua Deus coepit esse

Sub carnis velamine.
2. Ave, lampas veri solis,
Nova mater novae prolis,

Castitatis lilium;
Ave, virga nusquam arens,
Per quam suum Deus parens

Mundo misit filium.
3. Ave, mutans nomen Evae,
Per quam nobis iugum leve

Christi dedit veritas ;
Ave, per quam lux est data,
Per quam nobis dulcorata

Legis est austeritas.
4. Ave, virga veri turis,

Per quam sumus nostri iuris

Dei dante gratia;
Ave, mater benedicta,
Partu cuius est devicta

Mortis contumacia.
5. Ave, lumen fundens mundo,
Quod nos traxit de profundo

Ex lacu miseriae;
Ave, parens summi floris
Et superni plena roris

Virtutum congerie.

6. Ave, mater pietatis,
Quam laudare nemo satis

Vel potest vel potuit;
Ave, certa spes salutis,
Per quam luce destitutis

Vera lux innotuit.
7. Ave, deitatis arca,
Quam creator patriarcha

Clausit et aperuit ;
Ave, caeli lux et terrae,
Summam lucem digna ferre,

Quae te non deseruit.

8. Ave, navis institoris,
Portans manna peccatoris

Et panem angelicum,
Ave cella summi regis,
Dans de botro priscae legis

Nectar evangelicum.

9. Ave, castrum Bethaniae,
Marthae domus et Mariae,

Ut castrorum acies;
Ave, mater nostrae spei,
Per quam nobis verbi Dei

Visa carne facies.
10. Ave, summi regis thronus,
In qua Deus summe bonus

Incarnari voluit;
Ave, parens sine pari,
Per quam mortem captivari

Vetus hostis doluit.

11. Ergo nobis, mater pia,
Sis in huius vitae via

Dux et consolatio,
Ut post huius vitae statum
Videamus tuum natum

In caeli palatio.