91. Ad beatam Mariam V.

1. Maria, virgo virginum,
Ab aeterno data rege
Certissima spes hominum,
Adiuva me, fove, rege.

2. Regere vir insipiens
Non valeo me, Maria,
Tu autem, summe sapiens,
Sis indocti doctrix pia.

3. Pia Maria, expies

Cunctam a me nequitiam,
Sanctissima plus milies,
Quam dicere sufficiam.

4. Sufficiam numquid tuam,
Maria, laudem dicere,
Ad quam nec loquelam suam
Dicunt sancti sufficere?

5. Sufficere tamen queam
Te laudare competenter
Per gratiam aptus eam,
Quam Maria das libenter.

6. Libenter insipientes
Sufferre soles in via
Libenterque neglegentes
Supportes, mater Maria.

7. Maria, meam nimiam
Tu scis insipientiam,
Sed propter tuam gratiam
Da mihi sapientiam.

8. Sapientiam, qua sciam
Diligere Iesum Christum,
Qua te diligam Mariam,
Qua contemnam mundum
istum.

9. Istum mundum contemnere
Iam. Maria, me video,
Unde gratias agere
Iesu et tibi debeo,

10. Eo, euge, remotior

Ab amore mundi factus,
Quo pressura me gravior
Strinxit et fratrum detractus.

11. Tractus ad humilitatem
Ita Iesu promittente,
Odiam iniquitatem
Te Maria assistente.

12. Tentae sunt ad te. Maria,
Meae cogitationes,
Ut des mihi prece pia
Iesu benedictiones.

13. Dictiones mihi placent,
Quibus Maria miscetur,
Sed sunt graves, qui te tacent,
Cordi, quod tibi vovetur.

14. Vovetur tibi, Maria,

Corpus meum et cor meum.
Cuius probo prece pia
Propitium mihi Deum.

15. Deum Iesum relinquere
Me, Maria, fecit mundus,
Quamobrem hunc diligere
Nolo, cum sit et immundus.

16. Immundus mundus polluit,
Heu me, totam vitam meam,
Sed, Maria, qui voluit
Es te nasci, mundet eam.

17. Eam et tu suscipias
In curam in curae via,
Quae mundanas iam gratias
Respuit pro te, Maria.

18. Maria, mea peccata
Sunt innumerabilia
Et sunt nimis prolongata
Et, proh dolor, sunt grandia.

19. Grandia magis fluenta
Tuae, Maria, grariae
Abstergant inquinamenta
Meae tantae nequitiae.

20. Nequitiae ponam finem
Iam iuvante te. Maria,
Virtutibusque festinem
Quaerere Iesum in via.

21. In viaque veritatis
Per te, Maria, firmatus
Semper in Jesu mandatis
Iactem meos cogitatus.

22. Cogitatus similiter

In te, Maria, recondam,
Quo peragam salubriter
Viam meam gemebundam.

23. Gemebundam militiam
Mei gravis incolatus
Ad Iesu ducat gloriam
Tuus, Maria, precatus.

24. Precatus tui placitum
Mos, Maria, facit Deus,
Per teque novum spiritum
Recipit ab eo reus.

25. Abeo reus in multis

Ad te, redemptrix reorum,
Maria, quae ab occultis
Liberas corda multorum.

26. Multorum catholicorum,
Maria, prima patrona,
Auge semper salvandorum
Numerum in fide bona.

27. Bona, melior, optima
Esse, Maria, probaris.
Magnaque maior, maxima.
Miserorum recordaris.

28. Aris tuis, o Maria,

Ob hoc vovent se fideles.
Quia tu es illa pia
Sancta, quae peccata deles.

29. Deles aras, ara Dei,
Dedicatas daemoniis,
Maria, matrona spei,
Digna dignis obsequiis.

30. Obsequiis angelicis
Honorans perenniter
Laudibusque dominicis
Decoraris sublimiter.

31. Sublimiter, o Maria,
Nomen tuum elevatur,
In patria et in via
Ab electis adoratur.

32. Adoratur tamquam dignum,
Dignius ac dignissimum,
Vertens in fugam malignum
Vergens et salvans animum.

33. Animum ad cultum sanctum
Humanum trahis, Maria,
Dans gaudium aufer planctum,
Solacium es in via.

34. In via corpus infirmum
Si sternat vis itineris,
Manet sanum cor et firmum,
Cui, Maria, imprimens.

35. Eris ergo semper mecum,
Maria, per memoriam,
Ut etiam ipse tecum
Sim iugiter per gratiam.

36. Per gratiam iunctus tuam
Sic tuae societati
In pressura nunquam ruam
Itineris reprobati.

37. Reprobati sunt spiritus
Procul ab illius via,
Qui semper exstat deditus
Nomini tuo, Maria.

38. Maria, cunctis mentibus
Dulcis tua memoria,
Gloriae melos auribus
Et cordibus laetitia.

39. Laetitia sempiterna
Super capita eorum,
Qui semper habent interna
Cordium ad te suorum.

40. Tuorum patrum meritum
Sancta tenent vestigia,
Tenentes tuum filium
Iesum et te memoria.

41. Moriatur ergo mundo
Memoria cordis mei,
Ut vivam corde iucundo
Deo et tibi, laus Dei.

42. Dei cubicularia,

Dei voluntas, Maria,
Almi pneumatis hostia,
Iesu Christi mater pia.

43. Pia, patens, potens, dives
Divina thesauraria,
Me capias, me captives,
Turris abundans gratia.

44. Gratia indeficiens,

Spes vitae nunquam moriens,
Lux oriens, fons satiens,
Pie cunctis subveniens.

45. Subveniens sis, Maria,
Semper mihi peccatori,
Quamdiu sum in hac via,
Et da tandem bene mori.

46. Mori fac animam meam,
Maria, morte iustorum,
Ut vivere per te queam
In regione vivorum.