83. De beata Maria V.

1. Laude humani generis
Plus digna virgo ceteris,
Sponsas castas transgrederis
Alte sedens in superis.

2. Vitis abundans gratiae,
Mater spei et veniae,
Gaude, misericordiae
Mater, Dei et gloriae.

3. Sancta sanctarum omnium,
Maria caput virginum,
Christi sacrum palatium,
Trinitatis triclinium.

4. Creavit te ingenitus,
Obumbravit te genitus
Et fecundavit spiritus,
Es facta tota deitas.

5. Fecit Deus mirabilem,
Respexit servam humilem,
Sponsam quaerens amabilem,
Tibi non fecit similem.

6. Deum cum digna parere
Sis, gaudens eius munere,
Nemo potest concipere
Digne nec satis promere.

7. Te collaudare cupiunt
Cuncti, sed non sufficiunt,
Nam laudes tot conveniunt,
Laudantes quod deficiunt.

8. Virgo dulcis et sapiens,
Boni fons indeficiens,
Nobisque sis compatiens,
Quos ferit hostis saeviens.