187. De beata Maria V.

1. Virgo mater, cuius pater
Te gignete paritur,
Sic prolatus et lactatus
Pastor verbum noscitur.

2. Cista Christi tribuisti
Nubem, in qua latuit,
Quos creavit, poenis lavit,
Quas ultra sustinuit.

3. Nam pro suis atque tuis
Exstitit obtemperans,
At post crucem Sion ducem
Resurrexit properans.

4. Id mox pandit, tandem scandit
Misitque paraclitum,
Fide rata, spe probata
Caeli dans introitum.

5. Apparebit ac sedebit
Palam iustus arbiter,
Ne damnemur, sed salvemur,
Terge culpas iugiter.

6. Ope praesto semper esto,
Large ros clementiae,
Necte preces, fuga faeces
Cladis et angustiae.

7. Vas donorum optimorum,
Plenum privilegiis,
Lar virtutum, pontem tutum
Strue mergi consciis.

8. Te, Maria, certa via

Vitae, quae non deficit,
Ut te laudem, tuam laudem
Nemo loqui sufficit.

9. Quae scribuntur et dicuntur,
Longe supergrederis,
Licet claris osteudaris
Inclita plus ceteris.

10. Te post Ave fans "haud pave"
Gabriel magnificat,
Cosmus festis demptis maestis
Melos tibi replicat.

11. Eva luctum, sed tu fructum
Fudisti laetitiae,
Firma gaude, plane plaude,
Felix imbre gratiae.

12. Te, nec labant, praesignabant
Multi dudum indices,
Et ambarum paginarum
Crebri monstrant apices.

13. Tu praecellis lunae, stellis,
Gemmis, aromatibus,
Auro puro, forti muro,
Favis, ostro, floribus.

14. Grande lumen et acumen
Phoebi fert effulsio,
Sed splendoris amplioris
Praemines fastigio.

15. O regalis, almis alis

Praebe tegmen credulis,
Imperatrix, restauratrix
Manens ampla saeculis.

16. Mundi sator, dominator,
Quem portasti filium,
Singulare sine pare
Tibi sculpsit solium.

17. Sunt beati coronati
Diversis honoribus,
Ut trans colles mons praepolles
Digne quidem omnibus.
18. Tu ditaris et dotaris
Infinita gloria,
Tibi cedit et oboedit
Tota poli curia.
19. Tu maiorum ac minorum
Principatum possides
Et cum prole, vero sole,
Sola cunctis praesides.
20. Tui morum sat sanctorum
Aptos inter cumulos
Manifestas, ornas, gestas
Piae matris titulos.

21. Hanc cernentes et stupentes
De tam dulci copia
Sentiamus, quae rogamus,
Ipsius auxilia.
22. Maris astrum, Dei castrum,
Pelle turbas turbinum
Inque bono cursus cono
Faustum pone terminum.
23. Clausa sera mire mera
Miserere miseris,
Defendendo nec linquendo
Serva nos ab inferis.
24. Ora natum, ut reatum
Peccatorum deleat
Et post mortem nos ad sortem
Paradisi provehat.