43.

De beata Maria V.

1. Ave, virgo, virtutis speculum,
Salomonis thronus et ferculum,
Salva, rege fidelem populum
Et extolle usque in saeculum.

2. Benedicta Mariae viscera,
Caput, manus, pectus et ubera,
Crura, pedes et membra cetera,
Quae gestarunt regentem supera.

3. Ave dicunt caelorum numina,
Ave, mater, virtutum domina,
Ave semper, perfelix femina;
Per te nostra replentur culmina,
Per te mundi delentur crimina,
Tuas laudes et tua carmina
Nulla potest portare pagina.

4. Benedicta tua progenies,
Benedicta sit tua facies,
Benedicta tua caesaries,
Totum corpus et tota species;
Te saluto in die centies,
Flecto genu in nocte sexies,
Benedicta sis mille milies.