17. De beata Maria V.

1. Ave, magni patris agni
Parens benignissima,
Perquam cessit,quaenospressit,
Mors inferni pessima.

2. Vae mutasti, nam fugasti
Evae matrimonium,
Bum portasti et Iactasti
Summi patris filium.

3. Emendare me dignare
Tuum per auxilium,
Quae cum magis ipsis magis
Tuum oras filium.

4. Mente prona tu, matrona,
Repraesentas filium
Ulnis senis, virgo lenis,
In templi sacrarium.

5. Adiuvare me dignare

Nunc in hoc corpusculo,
Mater Christi, quem vidisti
Adfixum patibulo.

6. Reginarum flos cunctarum,
Vides natum, filia,
Resurgentem ac pergentem
Ad caeli palatia.

7. Illum vere nos videre
Per te fac in aethera,
Qui nos lavit et sanavit
Per tormenti vulnera.

8. Adiutorem, redemptorem,
Ora natum inclitum
Me mundari et salvari
Suum per paraclitum.

9. Generosa fulgens rosa,
Terge, quaeso, vitium,
Ne districtum per delictum
Sentiam iudicium.

10. Rosa florum, fons hortorum,
Hinc de carnis cellula
Praeter aequum fac ut mecum
Nulla pergat macula.

11. Alma Dei mater, mei
Ita curam habeas,
Ut post mortem me consortem
Beatorum facias.

12. Castitatis, pietatis

Virtutisque lilium,
Tribulatis, naufragatis
Confer adiutorium.

13. Increatum tuum natum
Tuo nunc precamine
Fac placatum, ne iratum
Cernam in examine.

14. Adiutricem te felicem
Nunc habere merear,
Cum damnatis pro peccatis
Ne a vita delear.

15. Plena bonis atque donis,
Vernans inter lilia,
Contemplaris, amplexaris
Gubernantem omnia.

16. Legem doce, per quam voce
Moribusque prosequar
Tuam laudem, fac et fraudem
Semper hostis persequar.

17. Eia, decus mundi, caecus
Per quam lumen recipit,
Fac, sim purus ac securus
Ab hoste, qui decipit.

18. Ne malorum vel reorum
Tormentis afficiar,
Per te piam nunc ad viam
Veritatis erigar.

19. Ac in usum vitae fusum
Per cruorem Domini
Me conforma, vitae forma,
Vitae, precor, ordini.

20. Dei parens sorde carens,
Mihi, rosa virginum,
Sis tutela contra tela
Venenosa daemonum.

21. O flos florum, vitiorum

Cunctam terge maculam,
Mater regis, omnis legis
Meque doce regulam.

22. Mundi rosa, plus formosa
Cunctis caeli civibus,
Fac, te deam digne queam
Venerari laudibus.

23. Ierusalem nata, talem
Genuisti filium,
Quo captivi redivivi
Evadunt supplicium.

24. Nunc in pugna pro me pugna
Hostis rumpens caveas,
Bello forti, quaeso, morti
Ne succumbam, caveas.

25. Virgo casta, semper asta
Mihi nunc auxilio,
Stella maris, mater maris
Ignara consortio.

26. Sanctitatis, deitatis
Gloriosa cellula,
Me dignare te laudare
Per aeterna saecula.

27. Tu per prolem pelle molem
Pravae consuetudinis
In me sitam daque tritam
Viam rectitudinis.

28. Et me grato te cum nato
Cultu fac exquirere,
Saevientes me quaerentes,
Semper hostes vincere.

29. Caeli rosa speciosa,

Per te me custodiat
Caeli princeps ac deinceps
Me a malis eruat,

30. Ut venenum me terrenum
Fac amorem spernere
Ac secura sorde pura
Christum vita cernere.

31, Mater Christi, quem pavisti
Inter tua brachia,
Contemplaris, stella maris,
Regem nunc in gloria.

32. Benedicta, quae amicta
Es virtutum floribus,
Tu spes reis, precor, meis
Succurre doloribus.

33. Eternorum fac bonorum,
Quaeso, me participem,
Quae supernum et aeternum
Genuisti principem.

34. Nata ducis, tu perducis
De terrena patria
Tibi notos ac devotos
Ad caelorum atria.

35. Equitatis, sanctitatis
Confer abundantiam,
Qua collata, virgo grata,
Da perseverantiam.

36. Da timentem mihi mentem
Et amantem Dominum,
Paenitentem ac deflentem
Pravitatem criminum.

37. Inter fluctus atque luctus
Praesentis exsilii
Nunquam sinas me per spinas
Interire vitii.

38. Casta, pia nunc in via
Per te fac ut habeam
Fidem rectam, spem perfectam,
Caritatem igneam.

39. Tu decora, precor, ora,
Ut det mihi filius
Finem bonum, quod est donum
Omni dono melius.

40. Ave, nata Deo grata,

Per te turis virgulam
Me virtutis et salutis
Fac implere regulam.

41. Tu, benigna, Deo digna,
Fac, ut bonis fulciar,
Precor, meo, da, ne Deo
Per tonsuram mentiar.

42. Vas pudoris et honoris,
Tua me clementia
Sic praecedat, ne me laedat
Hostis insolentia.

43. Inter bella pro me bella
Carnis immunditiae
Versus castra, tu me castra
Ferro pudicitiae.

44. Ne subtiles nunc hostiles
Incidam in foveas,
Meos gressus ad congressus
Pugnae rege, foveas.

45. Meis dona, virgo bona,
Pacem debitoribus,
Caritate bonis a te
Ornentur et moribus.

46. Virgo pura, me sub cura
Tui nunc regiminis
Fac benignum, Christi dignum
Corporis et sanguinis.

47. Larga mater, tibi pater
Doni plenitudinem
Procuravit, cum sanavit
Per te primum hominem.

48. Iacta, quaeso, mihi laeso
Partem plenitudinis,
Ne inferno in aeterno
Laedar vento turbinis.

49. Exstirpare tu dignare,
Mater veri luminis,
Nati dextra intus, extra
Sordem mei criminis.
50. Rex elegit te, qui regit
Supernorum agmina,
Cum quo gaudes, cui laudes
Promis atque carmina.

51. Iucundare, quae portare
Meruisti Dominum,
Qui sanavit et salvavit
Per te genus hominum.

52. Beata es millesies,

Plas quam dici valeat,
Natum ora, ut in hora
Mei curam habeat.

53. Virgo, dona, nunc ut bona
Seminare satagam,
Virga Iesse, ut in messe
Cum electis colligam.

54. Spiritalem nuptialem

Vestem da per filium,
Ne seducar vel perducar
Mortis ad exsilium.

55. Et, flos verni, ut interni
Fruar dono gaudii,
Purga mentem, tolle dentem
Furoris et odii.

56. Temporali, corporali

Me nunc poena corripe,
Virgo lenis, sed a poenis
Me post mortem eripe.

57. Benedicta, tu invicta,

Tu es sanctis sanctior,
Lux divina, ut cedrina
Cunctis arbor altior.

58. Estivalis et vernalis
Tu lucis amoenitas,
Pulchra florum, decus morum,
Tu virtutum claritas.

59. Nunc fac recto et perfecto
Incedamus tramite,
Ut ad chorum supernorum
Te ducamur comite.

60. Evae luctus pellit fructus
Tui ventris, domina,
Dum per crucem mundo lucem
Dat lavando crimina.

61. Deviare vel errare

Me non sinas, filia,

Ne supernae et aeternae

Priver vitae gloria.

62. Impraegnaris, verum paris
Deum necnon hominem,
Qui in caelo dulci zelo
Te coronat virginem.

63. Castitatis, sanctitatis
Et virtutum filia,
Lumen clarum tu sanctarum
Et sanctorum gloria.

64. Tua lege sic me rege
In hac vita positum,
Vas decoris, ut furoris
Evadam interitum.

65. Vas insigne, tibi digne
Semper Ave canitur,
Quia solis tuae prolis
Poenis poena solvitur.

66. Sancta, casta, tu devasta
Hostis fraudulentiam,
Lux superna, me guberna
Tuam per clementiam.

67. Fructuosa, generosa

Virgo, mater Domini,
Me nunc totum fac devotum
Tuo sancto nomini.

68. Reformatrix, vitae datrix,
Fac me sic praesentibus
Uti bonis, ut non donis
Priver aeternalibus.

69. Veritatem, puritatem
Omnemque iustitiam
Ad quaerendam et implendam
Fac ut semper sitiam.

70. Cunctis bona nunc matrona,
Errantem me corrige,
Ad rectorum iter morum
Gressus meos dirige.

71. Terrenorum me bonorum
Purga desiderio
Et cor meum fac sit plenum
Spiritali gaudio.

72. V.......

73. Sanctissima, piissima,
Omni plena gratia
Et formosa plus quam rosa,
Confer vitae spatia.

74. Vere, nata, coronata
Coram nato rutilas,
Mater laeta, sine meta
Nunc in throno iubilas.

75. Emendentur et salventur
Tuo nunc iuvamine,
Qui adorant et honorant
Te psalmorum carmine.

76. Nunc, matrona, largas dona
Mihi, quaeso, lacrimas,
Quarum unda sordes munda
Peccatorum pessimas.

77. Temporalem et carnalem
Pelle curam caelitus
Per amorem et fervorem
Doni sancti spiritus.

78. Rex caelorum angelorum
Super omnem ordinem
Exaltavit, honoravit
Te decoram virginem.

79. In hac vita, fac, ut ita
Cuncto vivam tempore,
Ut finita caelos trita
Possim via scandere.

80. Sis lapsorum sauciorum
Salutaris medica,
Quae in throno nati dono
Cantas caeli cantica.

81. Tu serena, Deo plena,
Noli me deserere,
Hic sis mecum meque tecum
Fac in aevum vivere.

82. Vas dulcoris, fons honoris,
Tu praecellis gloria
Omnes rectos et electos
In caelesti curia.

83. Impetrare tu dignare
Mihi, precor, omnia,
Quae petivi, Dei vivi
Mater atque filia.

84. Trinitati, unitati

Laudis sit memoria
Et Mariae, matri piae,
Fine carens gloria.