50. Oratio devota ad BVM.

1. Cur peccator desperem veniam,
Cum Mariam dulcem recogito,
Qui Mariae colo memoriam
Et Mariae sacra revisito?
Meam novit mater miseriam,
Et ad matrem ire non haesito,
Nosco matris immensam gratiam
Et ad mensam maternam mussito.

2. Cerne, virgo, cur Dei filius
In te verum se fecit hominem
Et te, virgo, qua nihil sanctius,
Puram semper reliquit virginem;
Cur cor tuum pertransit gladius,
Cum pro nobis effudit sanguinem
Et per tuum ave suavius
Vitae reddit Evae propaginem?

3. Cur, regina, caelis praesideas
Assueri iuncta coniugio
Et terrarum iura possideas
Angelorum iuncta collegio?
Si, regina, nostri non egeas,
Dum regali sedes in solio,
Te promotam pro nobis videas,
Qui vexamur in hoc exsilio.

i. O Maria, clientes respice
Et supporta gravamen oneris,
Felix mater, suggesto iudice
Tuis natis succurre miseris;
Semper, virgo, nos castos effice
Tela frangens serpentis veteris
Et, regnatrix, nos tuos refice
Dulci fructu, quo dulcis frueris.