157. De beata Maria V.

1. Salve, virgo gloriosa,
Ave, mundi domina,
Vale, mater generosa,
Gaude, plena gratia.

2. Peccatores et beati
Te collaudant adunati,
Tu, quam clamant tribulati.

3. Virgo sancta, lucens via.
Te adorant sol et luna,
Tu, quam clamant omnes una.

4. Piam aurem huc inclina,
Esto mihi medicina,
Tu, quae servas a ruina.

5. Tu reformes in amorem,
Quem offendi creatorem,
Tu, quae audis peccatorem.

6. Deprecare vultum Dei
Pro salute huius rei,
Tu, quae mater sistis ei.

7. Per virtutem sanctae crucis
Te clamantes ad te ducis,
Tu, quae sistis via lucis.

8. Virtuosa, tota clara,
Aufer cordis nunc amara,
Tu, quae Deo es tam cara.

9. Propter tuam bonitatem
Sana mentis pravitatem
Vale, donans sanitatem.

10. Ad te clamo, nimis pia,
Tu caelestis hierarchia,
Vale, virgo, o Maria.

11. Tu regina honorata

Dulcis, clemens et beata,
Tu, quae cunctis donas grata.

12. Paradisi vera clavis,
Felix porta, tuta navis,
Tu, quae nunquam dedignaris.

13. Defensatrix a ruina,
Liberare nos festina,
Tu, quae caeli es regina.

14. Mater casta et decora,
Roga pro me sine mora,
Tu, quae iuvas omni hora.

15. Virtuosa o puella,

Pia, dulcis plus quam mella,
Vale, clara maris stella.

16. Dominatrix angelorum,

Martyrum atque sanctorum,
Tu, quae porta es caelorum.