84. Commendatio BMV.

1. Laudes beatae virginis
Promat dulcedo carminis,
Vox laeta laudes intonet,
Et mens sincera resonet.

2. Quid eius laude dulcius,
Quid Maria pulchrius,
Quae clausa gestans viscera
Effecta est puerpera?

3. Eius excellens gloria
Mira perfert insignia
Et praefulget omnibus
Humanae vocis laudibus.

4. Sola Dei potentia
Et non naturae gloria,
Sola fide, quae credidit,
Virgo conceptum edidit.

5. Nam virginis fecunditas
Est inaudita novitas,
Dum virgo prolem generat,
Naturae iura superat.

6. Sic rubus ardens cernitur
Et igne non comburitur
In signum sacrae virginis,
Matris Dei et hominis.

7. Virga florescit arida,
Virgo tumescit gravida,
Flos candet lucis germine
Signans partum ex virgine.

8. Rore vellus infunditur
Nec tactu roris laeditur,
Sic virgo sine onere
Laetatur prolis munere.

9. Virgo prudens eligitur,
David in thoro iungitur,
Sed pro Mariae laudibus
Foedis caret amplexibus.

10. Virum circumdat femina,
Dum virgo, mundi domina,
Regem caeli amplectitur
Et gravida efficitur.

11. Princeps, qui cuncta providet,
In clausa porta residet,
Dum virginis in utero
Dei verbum considero.

12. Lapis de monte scinditur,
Et manu mons non tangitur,
Dum absque viri semine
Christus prodit de virgine.

13. Hoc testamenti veteris
Figurat arca foederis,
Quod verius ostenditur,
Dum manna ibi conditur.

14. Castum Mariae gremium
Figurat grande solium,
Quod Salomon ex ebore
Suo perfecit tempore.

15. In quo noster pacificus,
Christus rex, patris unicus,
Dum carnem sibi sociat,
Nos Deo reconciliat.

16. Hesther, regina humilis,
Iudith virtute similis,
Dum hostes Dei conterant,
Mariae laudes praeferunt.

17. Nam draco, sicut legitur,
Mulierem persequitur,
Sed caput eius conterit
Virgo, quae Deum peperit.

18. Haec sunt Mariae gaudia,
Haec virginis praeconia,
Quae, sicut terra lilium,
Sic est enixa filium.

19. Maria virgo nobilis,
Decora et amabilis,
Maria, virgo regia,
Regis mater et filia.

20. Maria solis nuntia,
Veri splendoris praevia,
Aurora innocentiae
Et gemma pudicitiae.

21. Maria, stella lucida,
Nubes levis et candida,
Viam praebet errantibus
Et portum naufragantibus.

22. Magnum Mariae meritum,
Omni virtute praeditum,
Fulget immenso iubare
Omni remota compare.

23. Mariam si aspexeris,
Nil adaequare poteris
Ipsius privilegio,
Quod meruit in filio.

24. Maria cunctis praeminet,
Quae totus orbis continet,
Nil dignius mens reperit
Excepto hoc, quod peperit.

25. Maria sole clarior
Et angelis sublimior,
Flos omnis pulchritudinis
Et manna est dulcedinis.

26. Et quamvis sic praemineat,
Ut omnibus praefulgeat,
Nec peccatores despicit
Nec paenitentes abicit.

27. Ipsa thesaurus gratiae
Et fons misericordiae,
Solamen paenitentium
Et nostrae spei gaudium.

28. Ipsa virgo perpetua,
Caelestis vitae ianua,
Caelum nobis aperuit,
Dum regem caeli genuit.

29. Ipsa suis supplicibus
Et pie se quaerentibus
Non deest in auxilio
Nec deerit in praemio.

30. Ibi regina virginum

Regem regum et dominum
Ostendet in laetitia
Et sempiterna gloria.

31. Nunc ergo dicant singuli,
Qui sunt Mariae servuli:
Ave, salus humilium,
Nostrae salutis bravium.

32. Tua, virgo, praesentia
Gaudet caelestis curia,
Tu supernorum civium
Corona et tripudium.

33. Tu aspectu pulcherrima
Et throno Dei proxima,
Regnas ibi feliciter
Et Iesum amas dulciter.

34. Cuius immensa claritas
Atque amoris suavitas
Te replet ac inebriat
Et omni bono satiat.

35. Quidquid ibi volueris

Aut quod benigne iusseris.
Hoc praestat voluntarie
Ipse auctor clementiae.

36. Nam matris ad imperium
Se recognoscit filium
Nec denegare poterit,
Quodcunque imperaverit.

37. Cuius relinquit gratiae
Sceptrum suae potentiae,
Ut omnes, quos vult, liberet
Et, quantum vult, remuneret.

38. Eia, virgo, considera
Collata tibi munera,
Nostra omnium redemptio
In tuo stat arbitrio.

39. Cum ergo tibi gratia
Non desit nec potentia,
Omnes ad te confugimus
Et opem tuam quaerimus.

40. Tu, virgo beatissima,
Tu omnium sanctissima,
Dignanter omnes respice
Et ope tua refice.

41. Tu votis nostris annue
Et larga manu tribue,
Nam tibi non minuitur,
Quidquid nobis tribuitur.

42. Tu abundas divitiis,
Tu frueris deliciis,
Quae vetustatem nesciunt
Nec detrimentum sentiunt.

43. Propter amorem filii,
Propter decus imperii,
Quo sublimata crederis
Adesto nobis miseris.

44. Tu nostra tege scelera
Nato praetendens ubera,
Ut, cum iudex advenerit,
Se filium meminerit.

45. Tu mater veri luminis,
Ad laudem tui nominis
Fac nos electis omnibus
Consortes in caelestibus.