179. De beata Maria V.

1. Vale, virgo gloriosa,

Virga frondens et frondosa,

Vitae salutifera,
Res miranda, caeli rore
Castitatis salvo flore

Virgo fit puerpera.

2. Nutu patris divinitus
Irrigavit paraclitus

Clausi hortus lilium,
Quo perfusa virginitas
Parit casta, fecunditas

Vera, salutis radium.

3. Iesse ex origine
Atque Sion germine

Stella Iacob oritur,
Ex Maria virgine
Et spirante flamine

Verbum Dei nascitur.

4. Rubum ignis inflammavit,
Virga florem germinavit,

Vellus rore maduit,
Virgo Deum paritura,
Creatorem creatura,
Rore caeli claruit.

5. Veluti solis radius
Subtile et integrius

Specular ingreditur,
Sic matrem Dei filius,
Immo multo subtilius
Intrat et egreditur.

6. O Maria, templum Dei,
Scala caeli, salus rei,

Mundi spes et gloria,
Pro indignis dignum digna
Natum ora, o benigna,
Virgo, Sion filia.