106. Ad beatam Mariam V.

O Maria, spes reorum,
Miseratrix miserorum,
Tuam per virginitatem
Mentis, carnis puritatem,
5. Per annuntiationem
Christique conceptionem
Sacrumque per eius ortum,
Qui salutis confert portum,
Tuique per vim doloris,

10. Quo eiusdem redemptoris
Es livore cruciata,
Per gaudium, quo laetata
Eius resurrectione
Eras et ascensione,

15. Tuumque per diem laetum,
Quando super omnem coetum
Exaltavit angelorum
Te reginam saeculorum,
Et amoris per amplexus,

20. Tibi natus quibus nexus
Est in aevum tuque nato
In amoeno caeli prato,
Per largam et eximiam
Tuam misericordiam,

25. Qua tu misericordiae

Nec non totius gratiae
Digne mater appellaris
Et pro reis deprecaris,
Templum Dei consecratum,

30. Tuum, precor, ora natum,
Ut propitietur cunctis
Vivis, etiam defunctis,
Qui vel quae me offenderunt,
Contra me vel deliquerunt.

35. Meis fac ut inimicis
Pius sit, ut non ultricis
Flammae sentiant abyssum
Pravitatis per commissum.
Peccatorum, quaeso, nexus

40. Solvat utriusque sexus,
Contra quos existo reus,
Sic ut salvet illos Deus,
Solvat functos et illorum
A reatu peccatorum

45. Tuam propter pietatem,
Fidem, spem et caritatem.
Fac, ut vivis det constanter,
Largiatur abundanter
Animabus defunctorum

50. Locis frui beatorum.

Mihi, fac, ut fidem rectam
Christus det et spem perfec-
tam,
Et, quod precor nunc, attende ;
Toto corde, tota mente,

55. Tota precor et virtute
Sempiterna pro salute.
Me diligere fac eum,
Ut me proximumque meum
Cum compassione tota,

60. Quoadusque fiat nota
Salus mihi sempiterna
Per te, virginum lucerna.
Ne me mortis tangat luctus,
Fac, ut in hoc mundo fructus

65. Dignos agam paenitendo
Paenitensque persistendo.
Mihi digne da deflere,
Mentis carnisque delere
Per lamenta, rosa florum,

70. Sordes cunctas vitiorum,
Tuam per precationem
Fletus post absolutionem
Nullum recommittam scelus,
Sic me Christi tangat zelus.

75. Veram des humilitatem,
Mentis, carnis castitatem
Pia interventione
In omni temptatione,
Deprecor, et in adversis

80. Huius saeculi diversis
Fac me vere patientem,
Recte semper incedentem.
Da per Christum, tuum natum,
Mihi cor illuminatum,

85. Destrue gulositatem,
Tribue sobrietatem
Sapientiamque veram,
Qua me recte semper geram,
Intus, extra vitam rectam

90. Da constanter et perfectam,
Talem, quae nec ipsum Deum
Proximum nec unquam meum
Scandalizet vel offendat,
Sed et mihi nunc ostendat,

95. Et in morte te felicem

Orat. ms. Scotorum Vindobone?

Sempiternam adiutricem.
Mater atque virgo para,
In praesenti ac futura
Mea tribulatione,

100. Mentis, carnis passione,
Cunctis, quibus hic infestor
Die, nocte vel molestor,
Da perfectum coniuvamen
Spiritaleque solamen.

105. Mihi digne da tractare
Tui, virgo, corpus nati,
Per quod integram peccati
Habeam remissionem,
Lucis quoque regionem.

110. O regina paradisi,

Mala, semper quae commisi
Hic indigne manducando
Corpus Christi vel tractando,
Cunctaque peccata prava

115. Ante mortem, quaeso, lava,
Sic ut cunctis fiam purus
A tormentoque securus
Dono tuae pietatis ;
De his cunctisque peccatis

120. Conscientiam da mundam
In extremis ac per undam
Fac ut cedat lacrimarum,
Quidquid superest amarum.
Spiritalem per amorem

125. Cunctum deleas errorem,
Gulam, curam corporalem,
Omnem motum temporalem,
Cuncta mundi blandimenta
Spiritus per documenta.

130. Cuncta tolle, mater viva,
Menti carnique nociva,
Menti carnique salutem
Confer nati per virtutem.
Sempiternae lucis testa,

135. Cuncta, quae petivi, praesta,
Da constantiaeque donum
Et in cunctis finem bonum.
Pater praestet haec et natus,
Sacer utriusque flatus,

140. Trinus unus, qui cunctorum
Dominatur saeculorum.