46. De beata Maria V.

1. Bonitatis

totius femina,
Sancta virgo,

caelorum domina,
Quae nos premunt,

dissolvens crimina,
Nostra clemens

audi precamina.

2. O regina

caelestis curiae,
Dignitatis

et excellentiae,
Per te nobis,

o mater veniae,
Remittatur

pondus nequitiae.

3. O aeterna

salus credentium,
Caro nitens

magis quam lilium,
Sicut turis

est odor vestium,
Os dulcius

quam favus mellium.

4. Si gens omnis

in unum coeat
Laudes fari

tuasque studeat,
Ferri quisque

si linguam habeat,
Nunquam dicet,

quantum oporteat.

5. Tua rosam

superat facies,
Columbarum

luminis acies,
Nulli rei

tam pulchra species,
In te splendet

carnis materies.

6. Flos rosarum,

lux ortis inclita,
Stella maris

fulgore praedita,
Per quam salus

est mundo reddita,
Ad salutem

sis nobis semita.

7. Te nascente

lux ingens oritur,
Tenebrarum

minister laeditur,
Ululando

de te conqueritur,
Triumphante

nato convincitur.

8. Gemma, sidus

splendoris nimii,
Luna fulgens

immensi radii,
Desolatis

plena spes gaudii,
Portus nobis

sis refrigerii.

9. Nulli ante

tua natalia
Tanta fuit

data potentia,
Te nascente

venit victoria,
Nobis autem

summa laetitia.

10. Per te nobis

spes attribuitur,
Infernorum
limes destruitur,

Peccatorum

culpa remittitur,
Et caelestis

palma promittitur.

11. O salvatrix

humani generis,
Interemtrix

totius sceleris
Gaude, virgo,

quae tanti muneris
Donatrix es

et portus miseris.

12. Gaude, mater,

tuoque gaudio
Nos colloca

precis auxilio,
Salvatori

concordans filio
Nos sanctorum

iunge consortio.

13. Benedicta

tua conceptio,
Benedicta

Christi progressio,
Crux, sepulcrum

et resurrectio,
Benedicta

eius ascensio.

14. Benedictus,

qui fecit sidera,
Mare, terram

et quaeque cetera,
Qui se clausit

in tua viscera,
Ut locaret

nos super aethera.

15. Benedictus

natus puerperae,
Qui redemit

membrorum vulnere
Pro parentis

damnatos scelere,
Qui lugebant

aeterno carcere.

16. Sancta parens,

nostra redemptio,
Spes miseris

et relevatio,
Per te nobis

fiat remissio,
Ne Satanae

vincat illusio.

17. O regina,

decus caelestium,
Miserorum

spes et refugium,
O adiutrix

te deprecantium,
Tuum ora

pro nobis filium.

18. Flos candoris,

flos pulchritudinis,
Non marcescens

prae vento turbinis,
Turris nobis

sis fortitudinis,
Ne mergamur

antro formidinis.

19. Qui pugillo

mundum complectitur,
Virginali

ventre concluditur,
O quam laeta

mater efficitur,
A qua tantus

infans concipitur.

20. Nulla stella

fulgoris radium
Tantum tulit

per orbis spatium,
Nam stellarum

rerumque omnium
Lumen profers,

cum paris filium.

21. Cum te caeli

suscepit curia,
Angelorum
gaudet militia,

Quantus plausus,
quanta laetitia,

Nulla capi
potest scintia.

22. Tibi, virgo,

laetantur omnia,
Gaudet Deus,

gaudet ecclesia,
Gaudet homo

ductus ad propria,
Sed infernus

agit suspiria.

23. Ave, mater

misericordiae,
Pietatis

et indulgentiae,
Ora natum,

qui fons est veniae,
Ut nos dono

confirmet gratiae.

24. Decus orbis,

sublimis femina,
Placa nobis

tonantis numina,
Creaturae

totius domina,
Tuae plebis

audi precamina.

25. Pia virgo,

pro peccatoribus
Es locata

in caeli sedibus.
Recordare

hoc te precantibus,
Subvenire

prompta fidelibus.

26. Humanarum

rerum condicio
Est attrita

calpae naufragio,
Sed tu, mater,

tuo suffragio
Supernorum

iunge consortio.

27. Prophetarum

praedicta carmine,
Exspectabant

sub mundi cardine
Res in suo

deformes ordine
Relevari

tuo iuvamine.

28. Te caelestis

exspectans curia
Exspectabat

tua natalia,
Nam per tua,

virgo, suspiria
Restauratur

eius militia.

29. Sicut rosa

de spinae germine
Nascens ornat

hanc pulchritudine,
Sic in tuae

gentis origine,
Virgo, nites

virtutum semine.

30. Virgo, gaude,

mater fidelium,
Orphanorum

salus, refugium,
Per quam culpa

deletur omnium,
Sempiternum

da nobis gaudium.

31. Auxilio

succurre celeri,
Nostro finem

imponens sceleri,
Ut de nostra

salute superi
Gratulentur,

ululent inferi.

32. Pulchra luna,

sidus eximium,
Solis vincens
fulgore radium,

Audi preces
te invocantium,

Sine mora
praebe auxilium.

33. Ave, mater

immensi pueri,
Benedictus

sit fructus uteri,
Qui destruxit

catenas inferi,
Quibus erant

oppressi miseri.

34. Arbor sancta,

plena virtutibus,
Liliorum,

rosarum floribus,
Quae dedisti

fructum fidelibus,
Ex quo vita

donatur omnibus.

35. Eva dedit

cunctis exsilium
Paradisi

excludens gaudium,
Reserasti

caeli palatium
Castitatis

per privilegium.

36. Salve, iubar

caelestis sideris,
Per quam patet

lux orta miseris,
Ordinibus

praelata superis,
Esto nobis

ductrix itineris.

37. Lux solaris,

lumen fidelium,
Salus ad te

confugientium,
Virgo sancta,

salvatrix omnium,
Caeli nobis

dona consortium.

38. Audi nostram

vocem, piissima,
Virgo mitis

et clementissima,
Delictorum

vi pressi maxima
Te precamur,

sanctorum optima,

39. Dei mater,

o virgo virginum,
Quae portasti

salutem hominum,
Vera cunctis

spes medicaminum,
Nos expurga

a labe criminum.

40. In te, virgo,

spes nostra ponitur,
Per quam daemon

ex toto vincitur,
Nam illius

caput conteritur,
Tuo pede

captivus premitur.

41. Erubescit

humani generis
Hostis nequam

et auctor sceleris,
Qui coniunctus

primum cum superis
Lapsus ruit

in ima carceris.

42. Et tu, virgo,

laetare maxime,
Quae sic thronum

sedis altissimae
Es adepta

vivens humillime,
Hostes nostros

potenter comprime.

43. Miraculum

magnum ostenditur:
Terra surgit,
spiritus labitur,

Illa gaudet,

iste confunditur,
Illa vivit,

et iste moritur.

44. Stella micans

plena fulgoribus,
Viam praebens

te intuentibus,
Emundatos

culparum sordibus
Nos catervis

iunge caelestibus.

45. Virgo sancta,

quae non ex semine
Concepisti

sed sancto flamine
Iesum Christum,

sanctorum agmine
Nos colloca

tuo iuvamine.

46. Virga Aaron,

quae tabernaculo
Floruisti

tanto miraculo,
Fructum praebens

captivo saeculo
Vitam tuo

largire populo.

47. Virga Iesse,

regali genere,
Cuius gaudet

redemptus munere
Totus mundus,

in Christi vulnere
Vitam velis

nobis acquirere.

48. Deprecare,

sanctorum gaudium,
Tuum, sancta

puella, filium,
Ut nos iungat

gregi caelestium
Bonus pastor

sanctorum ovium.

49. Mater, ope

succurre celeri,
Ne inferni

tradamur carceri,
Ut possimus

beati fieri,
Caeli nobis

ianuam aperi.

50. Nulla mala

in te cupiditas,
Nulla prorsus

laesit hostilitas,
In te mansit

perfecta sanctitas,
Vera fides

et vera caritas.

51. Plenitudo

divini muneris,
Quae per partes

praestatur ceteris,
Venit in te,

virgo, spes foederis,
Sicut imber

in lana velleris.

52. Nulla tibi

virtutum defuit,
Quarum in te

rex domum posuit,
Te caelestis

doctrina docuit,
Salvatoris

ut matrem decuit.

53. Novum quiddam

in mundo cernitur,
Nam de stella

sol fulgens oritur,
Tenebrarum

horrori ponitur
Finis, via

caelorum panditur.

54. Creatura

totius ordinis
Te fatetur

immensi nominis

Sublimatam

in throno numinis
Sine fine

beatitudinis.

55. Porta caeli

per Evam clauditur,
Gens humana

tormentis traditur,
Per te, virgo,

libertas redditur,
Et caeleste

regnum conceditur.

56. Hostis telo

livoris figitur,
Cum in caelum

plebs tua ducitur,
Vulnerando

maestus atteritur
Et de tuo

posse conqueritur.

57. Inde plaudit

caelestis curia
Exsultando

pro tua gloria,
Laudans Iesum,

qui fecit talia,
Admirando

eius magnalia.

58. Nostris, virgo,

faveto vocibus,
Angelorum

nos iungens coetibus,
Ut laudantes

te magnis plausibus
Exsultemus

cum sanctis omnibus.

59. Sanctitatis

ornata moribus,
Praemunita

virtutum floribus,
Virgo decens

et digna laudibus,
Creatoris

refulgens opibus.

60. Totam, virgo,

te sapientia
Perlustravit

sua potentia,
Cum descendit

divina gratia
In te monstrans

sua magnalia.

61. Carnem in te

cum Christus induit,
Nihil in te

tunc boni defuit,
Virginitas

tua sic floruit,
Creaturae

quod omni profuit.

62. Virgo, tuo

redempti munere
Non cessamus

psallendo reddere
Grates tibi

pro tanto foedere,
Quo nos Christus

dignatur visere.

63. Natos tuos,

o mater, libera,
Virgo manens

Christi puerpera,
Ne nos damnet

inferni vipera,
Quae in multos

exercet scelera.

64. Iamque tui

sumus nos filii,
Quos de luctu

trahens exsilii
Reduxisti

ad plausum gaudii
Per angelum

magni consilii.

65. Virgo manens

et mater regia,
Te beatam
fatentur omnia,

Meritorum
tot privilegia

Explicare
nequit ecclesia.

66. Angelorum

laudata modulis,
Universis

miranda populis,
Virgo cunctis

praelata saeculis,
Vitam tuis

acquire servulis.

67. Delictorum

compressa pondere
Mens humana

nequit sufficere,
Laudes tuas

ut possit dicere,
Quae nos ditas

divino munere.

68. Tu salutem

humano generi
Edidisti

de claustro uteri,
Per te, virgo,

vincuntur inferi,
Per te gaudent

in caelo miseri.

69. Cum creata

rex benediceret,
Tunc providit,

quod in te fieret
Deus homo,

qui nos redimeret
Et aeternos

in bono faceret.

70. Benedixit

in te tunc omnia,
Ex qua salus

et beneficia
Processerunt

et vera gaudia,
Paradisi

portus et gloria.

71. Quid dicemus

defecti viribus
Et compressi

delictis gravibus?
Si res omnes

resonent vocibus,
Tuis victae

succumbent laudibus.

72. Laudes tuae

momenta temporis
Et arenas

excedunt aequoris,
Renovatis

da vires corporis
Sensum mittens

in arcam pectoris.

73. Bonum nobis

confer ingenitum,
Ut possimus,

virgo, spes omnium,
Te laudare

tuumque filium
Et habere

caeli consortium.

74. Peccatorum

nos terge macula,
Nostra prece

tonantem sedula,
Ut nos sua

sustentans ferula
Vitae donet

caelestis pabula.

75. Nostrum decus

et nostrum gaudium,
Virgo sacra,

candoris lilium,
Rosa vernans

et potens omnium,
Sedem dona

nobis caelestium.

76. Eva dedit

pomum mortiferum,
Ex quo mundus
se sensit miserum,

Superasti

factorem scelerum,
Fructum vitae

dans salutiferum.

77. Quid valeret

nostra fragilitas,
Quam decepit

hostis caliditas,
Nisi esset

tua humilitas,
In qua sumpsit

carnem divinitas?

78. Ecce, pulchrum

bellum componitur,
Inter Satan

et te confligitur,
Sed captivus

ille convincitur,
Et pars tua

victrix efficitur.

79. Victrix gaudes,

et victus ululat,
Dolor eius

in dies pullulat,
Inde caelum

exsultans iubilat,
Plausum vero

mundus adcumulat.

80. Evam nequam

hostis admonuit,
Unde genus

humanum doluit,
Adam miser

in culpam corruit,
Dum praeceptum

servare noluit.

81. Ut per Evam

nostra perditio,
Sic per te fit

nostra redemptio,
Ut per Adam

mortis illatio,
Sic per Christum

fit restauratio.

82. Te laudare

beatam cupimus,
Sed in laude

tua deficimus,
Sensus noster

adhuc est minimus,
Cum nos de te

tanta conspicimus.

83. Nam si mundus

pagina fieret,
Et res omnis

in ea scriberet,
Laudes tuas

non comprehenderet,
Quia tot sunt,

quod non sufficeret.

84. Ergo quantum

movet invidia
Hostem saevum,

qui pro superbia
De supernis

lapsus in vilia
Vilis factus

est super omnia,

85. Cum te cernit

praelatam omnibus
Et se videt

mersum foetoribus!
Quantis, putas,

movetur tristibus,
Nobis nocens

in cunctis actibus?

86. Sed succurre

nobis celerrima,
Ne nos damnet

pars impiissima,
Argumenta

quae fraudum plurima
Tendit multos

ducens ad infima.

87. Benedicta

in mulieribus,
Te rogamus

immensis precibus,

Ne nos claudat
inferni faucibus

Daemon, suis
obsiste fraudibus.

88. Quando potest

quemquam decipere,
Tunc laetatur

pro tanto scelere,
Noli, pia

virgo, concedere,
Plebem tuam

quod possit laedere.

89. Tueatur

nos tua dextera,

Qua donabas
panem et cetera

Tuo nato,

qui rerum genera

Creavit reg-
nans super aethera.

90. Totus orbis

est tibi subditus,
Opem illi

confer divinitus,
Ne nos laedat

poenalis exitus
Nec malignus

inferni spiritus.

91. Super tua

plebe non gaudeat
Tuus hostis,

sed magis doleat,
Tua nobis

virtus praevaleat
Et in bono

semper nos teneat.

92. Theophilus,

o mater veniae,
In foveam

lapsus malitiae
Argumentis

misericordiae
Tuae nobis

adest potentiae.

93. Virtus nostra

iam paene deficit,
Saxa fraudis

et hostis obicit,
Mentem nostram

in multis inficit,
Gaudens cum nos

adflictos conspicit.

94. Tu illius

destrue gaudium
Donans nobis

Christi consortium,
Ut lugeat

inventor fraudium,
Et tu salves

gregem fidelium.

95. Tuam, mater,

serva ecclesiam
Omnem pellens

ab hac tristitiam,
Sempiternam

praebe laetitiam
Ad sanctorum

conducens gloriam.

96. Huius laudis

quisquis memoriam
Celebrabit

poscendo veniam,
Tu fac illi

misericordiam
Beatorum

donando gratiam.

97. Et nos tibi,

virgo, consocia,
Ut gaudentes

in tua gloria
Coram summi

patris praesentia
Decantemus

eius magnalia.

98. Trinitati

sit laus, potentia,
Honor, virtus

et excellentia,
Tibi, virgo,

summa laetitia,
Nobis autem

perfecta gloria.