58. De beata Maria V.

1 a. Gaude, gemma virginum,
Prima salus hominum,
Nondum nata consecrans:

1b. Gaude, quae dum nasceris,
Sancto mox depasceris
Spiritu, quo obumbraris.

2 a. Gaude, Maria, laetaris

Verbo, per quod fecundans,
Gabriel quod edidit:

2 b. Gaude, Maria, quae paris
Filium, quo tu crearis,
Quique cuncta condidit.

3 a. Gaude, virgo venerata
Tribus magis, adorata
Tribus donis et personis,
Nato sollemnissima.

3 b. Gaude, templo praesentata
Dudumque desiderata,
Consecraris et laetaris
Prole sacratissima.

4 a. Gaude, regina caelorum,
Tibi paret angelorum
Cunctorumque dominus

4b.........

5 a. Gaude, Maria, quae natum,
Iesum tuum, morti datum,
Post mortem glorificatum
Partum das laetitiae.

5 b. Gaude, felix advocata,
Nobis miseris parata,
Arrha vitae nuncupata,
Fons misericordiae.

6 a. Gaude, mortis calcans statum
Caeli transis ad ornatum,
Corpus gerens cumulatum
Sempiterna gloria.

6 b. Gaude, caelos ut intrasti,
Tu Seraphim decorasti,
Tu Cherubim illustrasti,
Supernorum domina.

7 a. Eia, pia mater Dei
Et hominis quoque rei
Vivum patrocinium,

7 b. Tuis natis tuum natum,
Bona mater, da placatum
Nunc et post hoc exsilium.