104. Ad beatam Mariam V.

1. O Maria, miserorum
salus et refugium,

O Maria, una salus,
una spes fidelium,

O Maria, esto pia
meum ad auxilium.

2. O Maria, iam audito

tuo dulci nomine
Dissipantur graves imbres

paenitentis animae,
Et paulisper ampliori

illustratur lumine.

3. Ora Deum, qui te matrem

voluit eligere,
Iube carnem, quam tu sola

meruisti gignere,
Et exora Christum tuum,

ne me velit perdere.

4. O Maria, totum venit,
quidquid tu rogaveris,
Ille Deus vult omnino,
quidquid tu volueris,
Illa caro non praesumit,
nisi quod tu iusseris.

5. O beata mediatrix,

quae sic potes omnia,

Cuius velle nec perturbat
Dei praescientia,

Nam praescivit totum esse,
quidquid tu vis, domina.

6. Pro me saltem semel ora,
et hoc mihi sufficit,

Velle tuum, o Maria,
satis mihi proficit,

Quia, tantum ex quo dicis,
statim Deus efficit.

7. O regina, cui cuncta

fiunt possibilia,
Quidquid petis, tecum petit

tota caeli curia,
Totum quaerens, totum volens,

quod vult sua domina.

8. O Maria virgo, roga

tuum unigenitum,
Ut conservet in me tandem

castitatis lilium,
Te iuvante quo petente

merear tripudium.