38. De beata Maria V.

1. Ave, virgo singularis,

Gemma pudicitiae,
Fluctuantis stella maris,

Fons misericordiae,
Stella, quae, dum solem paris,

Patrem tibi filiae,
Caelo digne coronaris,

Iuncta regi gloriae.

2. Ave, mater gloriosa,

Verbi Dei cellula,
Tota pulchra et formosa,

Tota sine macula,
Tu es lilium et rosa,

Rectrix in navicula,
Qua transimus procellosa

Saeculi pericula.

3. Ave, nubes matutina,

Roris stillicidium,
Quibus gratia divina

Poros pluit cordium,
Imperatrix et regina

Caeli, terrae, marium,
Serva vitam a ruina

Tibi supplicantium.

4. Ave, quies viatoris,

Te sequentis praevia,
Favus intimi dulcoris

Satians praecordia,
Pia mater salvatoris,

Reduc ad caelestia,
Quos antiqui temptatoris

Expulit invidia.

5. Ave, decor firmamenti

Sidusve errantium,
In salutem paenitenti

Tu stagnum probaticum,
Tu es arca testamenti

Portans manna caelicum,
Quo pascuntur in praesenti

Corda tibi supplicum.
6. Ave, templum trinitatis,

Pudoris signaculum,
Plenitudo caritatis,

Miseris umbraculum,
Solve salvans a peccatis

Istum tuum populum,
Pro quo Iesus Christus gratis

Subiit patibulum.

7. Ave, quam praeconizavit

Prophetarum contio,
Quam scriptura praesignavit

Omnis ab initio,
Rubus, quem consideravit

Moyses [in invio],
Tuum partum praemonstravit

Sui non incendio.

8. Ave, templum Salomonis,

Sed non manu conditum,
Turris vallis visionis,

Castrum muris insitum,
Leva signum unionis

Gratiae ad spiritum,
Ut hostilis stationis

Terreas exercitum.

9. Ave, quae, dum credidisti

Caelesti spiritui,
Incorrupta concepisti

Dei parens nutui;
Ergo, mater Iesu Christi,

Confer opem coetui,
Cuius causa meruisti

Hoc honore perfrui.

10. Ave, per quam est collata

Prophetia puero,
Ut te voce non prolata

Salutet in utero.
Ut Elisabeth, adflata

Flatu salutifero,
Dei matrem est testata

Te clamore libero.

11, Ave, genetrix effecta

Nullo viri foedere,
Sola virgo praeelecta

Sine poena parere,
Luna de te nube tecta,

Sol prodit de sidere,
Luna, inquam, sed perfecta,

Nesciens deficere.

12. Ave, virgo, de qua natus
Deus verus creditur,
Idem creans et creatus,
Actor est et agitur,

In praesaepe reclinatus
Pannis circumcingitur,

Sed in caelis adoratus
Sine fine colitur.

13. Ave, quam honorant reges

Mysticis muneribus,
Suos dum observant greges,

Cognita pastoribus,
Quae cum veteris non eges

Legis baptismatibus,
Sponte tamen imples leges,

Non ligata legibus.

14. Ave, decus mulierum,

Quae in templo Dominum
Obtulisti, lumen verum,

Salvatorem hominum,
Et nunc populum et clerum

Salva, virgo virginum,
Dans in ultimo dierum

Veniam peccaminum.

15. Ave, quae Iesum infantem

Cum dolens quaesieras,
Invenisti disputantem

Non edoctum literas,
Tuum populum peccantem,

Quaesumus, ne deseras,
Sed requirens aberrantem

Tecum caelo transferas.

16. Ave, per architriclinum

Invitata nuptiis,
Ubi fecit aquam vinum

Christus in conviviis,
Color aquae in citrinum

Transit sine mediis,
Tua fide fit divinum

Opus hoc in hydriis.

17. Ave, videns tui nati

Flagellari latera,
Videns et in cruce pati

Mortis dira vulnera,
Aperitur dum rimati

Pectoris pars dextera,
Aqua, sanguis dirimati

Nostra lavant scelera.

18. Ave, fidem quae sustentas

Passionis triduo
Hancque sola repraesentas

Fervore continuo,
Modo haereses inventas

Sic elide denuo,
Ut has fides turbulentas

Devitet perpetuo.

19. Ave, laeta versa vice,

Quando nostri generis
Salus manu cum victrice

Rediit ab inferis,
Unde patet cicatrice

Visa sui lateris,
Quod pro plebe peccatrice

Poenam tulit funeris.

20. Ave, videns corpus idem

Factum impassibile,
Quod de te assumpsit pridem,

Scandens caelum agile,
Creatori tale quidem

Competit mirabile,
Non natura, sed per fidem

Cuiquam credibile.

21. Ave, caelos quae transcendis
Singulos per ordinem,
Dei donec apprehendis
Throni celsitudinem,

Ubi iugiter intendis
In eius imaginem,

Quem pro nobis redimendis
Genuisti hominem.

22. Ave, quae iam Deo plena,

Sed modo plenissima,
Quondam particeps in poena,

Nunc regnanti proxima,
Nostra canit te camoena,

Laudat vox et anima,
Quia tu es vitae vena

Laudeque dignissima.

23. Ergo, pia mater Dei,

Laudes has suscipito,
Quas innixus de te spei

Reus tibi recito,
Me reatus rodunt mei

Cordis in abscondito,
Sed medelam huius rei

Ratus te recogito.

24. Credo namque, quod non perit,

Qualiscunque fuerit,
Qui commissa flendo terit

Et peccare deserit,
Sed si te devote quaerit

Tuique meminerit,
In aeternum salvus erit

Nec perire poterit.