30. Oratio de Beata Virgine
ad modum serti facta.

1. Ave, signis figurata,
Fide dignis adprobata,

O deitatis forma,
Ab aeterno praeparata,
In scripturis figurata,

O sanctitatis norma.

2. Ave, alvo consecrata,
Mediatrix nobis data,

O sancta propago,
Gabriele salutata,
Patris dono obumbrata,
O dulcis imago.

3. Ave, pneumate rigata,
Trinitate fecundata,

O vitis fructuosa,
Christi mater, soror, nata,
Imperatrix Deo grata,

O immaculata rosa.

4. Ave, trinitatis stilla,
Dei mater et ancilla,

O filia prolis,
Casta, humilis, tranquilla,
Grandis, lenis et pusilla,

O ianua solis.

5. Ave, grata margarita,
Solo tecta, sed quaesita,

Purissima puella,
Manu Dei expolita
Et virtute redimita,

Clare micans stella.

6. Ave, vellus Gedeonis,
Purum vas electionis,
Aromatizans cella,
Ardens rubus visionis,
Mater veri Salomonis,
O rosula bella.

7. Ave, mater illibata,
Virgo mire impraegnata

De cellula mellis,
Aula regis adornata,
Caritate deaurata,

O nescia fellis.

8. Ave, sidus matutinum,
Fletum tergens vespertinum,

O lux tenebrarum,
Caelum purum crystallinum,
Pietatis pande sinum,

O pulchra rosarum.

9. Ave, Christo consecrata,
Rosa rosae copulata,

O flos sine spina,
Hesther mire sublimata,
Nostra clemens advocata,

O stella marina.

10. Ave, virgo, mater, parens,
Stella micans, labe carens,

O virgo serena,
Caeli porta cunctis patens,
Fons salutis large scatens,

O mater amoena.

11: Gaude, clavis carcerum,

Medicina vulnerum,

O dux animarum,

Pauperum solacium,

Mundi sanctuarium,

O sacra sacrarum.

12. Gaude, palma gloriae,
Signum tu victoriae,

O cedrus odora,
Rosa patientiae,
Murtus temperantiae,
O gemma decora.

13. Gaude, nubes lucida,
Divo rore gravida,
O virgula turis,
Virga Iesse florida,
Austro flante rorida,
O praevia iuris.

14. Gaude, innocentiae
Sedes, sapientiae

Nivea columba,
Aula regis aurea
Ac virtute florida,

O deitatis tumba

15. Gaude, Dei balsamus,
Caeli ingens iubilus,

O virgo pudica,
Prophetarum calamus,
Tu conclusus hortulus,

O regis amica.

16. Gaude, mater humilis,
Virgo Christi nobilis,
O summa columna,
Tu lucerna luminis
Et vas purum numinis,
O pacis alumna.

17. Gaude, vas munditiae,
Vena scatens veniae,

Veniam propina,
Invicta dux iustitiae,
Serena lux laetitiae,

Caelica regina.

18. Gaude, regis solium,
Virtutum viridarium,

O flos dominarum,
Dei promptuarium,
Pneumatis sacrarium,

O sancta sanctarum.

19. Gaude nunc, stellifera,
Regina sceptrifera,

Stella matutina,
O alma christifera,
Oliva fructifera

Et flos sine spina.

20. Gaude, clavis caelica
Et dulcedo mellica,

Clavis carceralis,
Mater tu virginea,
Tis natus verbigena,

Virgo maternalis.

21. Salve, ebur castitatis,

Thronus summae maiestatis,

Auro circumdatus,
Sacer sponsi thalamus,
Claritate fulgidus,

Floribus ornatus.

22. Salve, caeli porticus,
Hortus aromaticus,

Flamine rigatus,
Amoenitatis rivulus,
Iucunditatis flosculus,

Liliis stipatus.

23. Salve, lux scientiae,
Inventrix clementiae,

Gratiae pincerna,
Rosa rubens facie,
Stans firmiter in acie,

Subventrix aeterna.

24. Salve, porta aurea,
Fenestra caeli pervia,

Porta clausa ducis,
Ore facundissima,
Vultu devotissima,

Maestos introducis.

25. Salve, caelum reserans,
Elementa superans,
Tis fecunditate,
In supernis imperans
Et prae cunctis iubilans
Tua sanctitate.

26. Salve, forma virginum,
Fortitudo flaminum,

Martyrum corona,
Verbis efficacior
Herbisque salubrior,

Dans aeterna dona.

27. Salve, terra latior
Abyssoque profundior,

Summa pietate,
Mente sole purior,
Lunari globo clarior

Divina claritate.

28. Salve, angelis subtilior,
Spiritibus agilior,

Sanctior creatis,
Cherubim prudentior,
Seraphim ardentior

Ardore caritatis.

29. Salve, caelo altior
Atque sanctis sanctior,

Prona trinitatis,
Gemmis es acceptior
Regnisque praestantior,

Paradisus deitatis.

30. Salve caeli imperatrix,
Nostri casus reparatrix,

Subleva gravamen,
Regem clemens supplica,
Ad parcendum provoca;

Omnes dicant Amen.