129. De beata Maria V.

1. Quid vigoris, quid amoris,
Quid affectus, quid dulcoris

Habet nomen virginis,
Est expertus totus mundus,
Scit peccator et immundus,

Quae spes huius nominis.

2. Dicant illi, qui damnati,
Sed ad vitam revocati

Sunt Mariae precibus,
Dicat ille desperatus
Vicedomus, sed salvatus

De inferni faucibus.

3. Dicant omnes tribulati
Et peccatis onerati,
Ubi sit refugium,
Ad petendum, ad habendum
Certe, tute recurrendum
Ad Maria gremium.

4. Ad hanc currunt omnes rei,
Ibi annum iubilaei

Habet nostra servitus,
Ipsa lima peccatorum,
Spes dolorum, scala morum,
Via scalae caelitus.

5. Quidquid est in creaturis
Bonis, castis, mundis, puris,

Nomen parat virginis,
Quodque ita nominatur,
Per effectum comprobatur,
Cum rem praebet nominis.

6. Ipsa fructus, ferax tellus,
Irrigatum rore vellus,

Ipsa sicca area,
Ipsa domus, templum, thronus,
Portus, porta, portans onus,
Granum sine palea.

7. Botrus Cypri, palmes, palma,
Cedrus alta, vitis alma,
Cupressus de Libano,
Terra, mare, aer, ignis
Portans, vehens, spirans ignis
In amoris clibano.

8. Tuber rubi, rubens rosa,
Violarum gratiosa,

Acanthus et lilium,
Tu murtetum, olivetum,
Tu lauretum et rosetum,

Flos campi convallium.

9. Nardus, murra, thus, pigmen-
tum,
Cinnamomum, calamentum,
Crocus, muscus, fistula,
Storax, stacte et amomum,
Nux, resina, replens domum
Aromatum cellula.

10. Mel dulcoris, flos odoris,
Fons stuporis, pons laboris,

Incorrupta balsamus,
Arca, liber, testamentum,
Virga, manna, condimentum,

Castitatis thalamus.

11. Sponsa, coniunx coniugata,
Mater patris, nati nata,

Virgo, decus virginum,
Leprosorum medicina,
Menstruatis fons, piscina,

Vita, salus hominum.

12. Ebur, vestis pretiosa,
Inaurata, gloriosa

Tu talaris tunica,
Sceptrum, sertum, diadema,
Tu Samsonis es problema,

Spes post Deum unica.

13. Tu es propositionis

Mensa panum, cum coronis

Propitiatorium,
Urna legis, funda David,
Quo Goliam nostrum stravit,

Tu reclinatorium.

14. Sunamitis Elisaei,

Quae quandoque fecit ei

Mensam et cenaculum,
Hortus clausus, fons signatus,
Austro leni qui perflatus,

Tu Ionae umbraculum.

15. Tu minera claritatis,
Aurum fulvum deitatis,

Tu fenestra vitrea,
Paradisus voluptatis,
Ad exemplar caritatis

Tu vitta coccinea.

16. Murus Sion, turris David,
Urbs, castellum, quodintravit,

Qui patri complacuit,
Tu ancilla, tu puella,
Tu plorantis es fiscella,

In qua vates latuit.

17. Apotheca specierum,

Servans vitae dulce merum

De Engaddi vinea,
Avis rara, cara caris,
Vittae perpendicularis

In directum linea.

18. Lex naturae, limes legis,
Mitigatrix irae regis

Risum Sarae faciens,
Tu es decus puellarum,
Tu securis prophetarum

Lignum, ferrum attrahens.

19. Tu Eliae indumentum,
Aurae lenis blandimentum

Ad cantus adiiciens,
Phoenix sola, philomena,
Cuius dulci cantilena

Deitas exsiliens.

20. Cantu cordis emollita,
Tracta venit non invita

In puellae gremium,
De te dictum pratum ridet,
Quis non audit, si non videt,

Hunc concentum avium.

21. Sic perennis ad decorem,
Sic est cantus ad amorem

Horum concinentium ;
Turtur, pavo, phasianus,
Passer, corvus, pelicanus
Te vel tuum filium

22. Signant gestu vel decore,

More, cantu vel maerore,

Sic et cantus merulae;

Signum huius et columba,

Quae est simplex et palumba,

Sed sunt voces querulae.

23. Virga virens in deserto,
Petra fluens in aperto,

Concha, ros, mons montium,
De quo monte est praecisus
Lapis ille non abscissus

Complectentum manibus.

24. Lapis iste lapis mirus,

Plus vigoris quam saphyrus

Habet et topazius,
Cum smaragdo amethysti,
Cum beryllo sunt et isti

Onyx et ligurius.

25. Onychinus et iacynthus,
Chrysoprassus auro tinctus,

Sardius cum iaspide,
Chrysolithus et sardonyx
Cum achate, chalcedonis

Cum rubino lapide.

26. Omnes isti in decore,
Vel virtute vel calore

Vel valoris pretio,
Idem est de adamante,
De magnete, diamante

Et de garamantio.

27. Ad Mariae sunt honorem,
Ad ornatum vel decorem

In proprietatibus,
Ipsa enim est regina,
Habens haec sub disciplina

In varietatibus.

28. Tu lux lunae, pansilenos
Habens dies, menses plenos,

Tu aurora rutilans,
Tu es dies noctem pellens,
Tu sol stella es praecellens

Tenebras enubilans.

29. Tu regina es caelorum,
Decus, honor, spes sanctorum,

Angelorum domina,
Agni sponsa, mater Dei,
Omnis laus debetur ei

Per haec multa nomina.

30. Quodque plura sunt quam cen-
tum,
Vult utrumque testamentum

Pari concordantia,
Sed sint omnes his intenti
Et ad praesens sint contenti
Brevitatis gratia.

31. Fecit ergo duo Deus,
Ut salvetur homo reus,

Quae ponit versiculus,
David intra scripta sua
Ita dicens: virga tua

Atque tuus baculus

32. Ipsa me sunt consolata,
Per haec duo est ablata

Omnis desperatio;
Nam per crucem et Mariam
Istam dulcem, illam piam

Datur liberatio,

33. Nam in cruce gloriari
Nos oportet et salvari,

Ubi est redemptio,
Ibi habes, unde plores,
Ibi forma, per quam rores

In mortis supplicio.

34. Hoc est lignum hinc educens
Et ad caelum introducens

De mundi diluvio,
Hinc recurras ad Mariam
Dulcem illam, dulcem viam

De maris naufragio.

35. Ipsam isti interpellant,
Peccatores hanc appellant

Timore iustitiae,
Ipsa audit appellantes
Et defendit convolantes
Ad tribunal gratiae.

36. Curre ergo ad hanc ducem
Ad Mariam et ad crucem,

Utrobique sanitas,
Hic quaerenti invenire
Et pulsanti aperire

Datur, quidquid flagitas.

37. Nemo posset explicare,
Quam sit novum salutare
Mater Christi, Maria,
Nam in omni fato tristi
Invocata matre Christi
Curritur per maria.

38. Ipsam ergo venerari,
Ipsam decet amplexari

Corde, ore, opere,
Ipsa sibi famulantes
Et adflictos conclamantes
Videt, audit propere.

39. O si Adam invenisset

Et post culpam confugisset

Sub crucis auxilio,
O si Eva illud Ave
Repperisset, per quod a vae

Facta est salvatio.

40. Si vertisset suum nomen,
Habuisset bonum omen

Nominis conversio,
Quod fuisset emundata
Et per Ave reparata

Hominis transgressio.

41. Cain ille desperatus
Non fuisset vulneratus

Sub tali latibulo,
Immo Iudas liberatus,
Si adisset pium latus
Sub crucis umbraculo.

42. Iuxta crucem [stat Maria],
Ibi Rachel, ibi Lia,

Ibi vita gemina,
Crucis labor est activa,
Sed in spe contemplativa

Dulciora germina.

43. Hoc est dulce, hoc amarum,
Hoc est carum, illud rarum,

Sed oportet hominem
Ad hoc dulce pervenire
Et medullam invenire
Per amaritudinem.
44. Prius Lia maritari,
Prius Rachel copulari
Debet in coniugium,
Per ascensum purpuratum
Est eundum inauratum
Ad reclinatorium.

45. Duplex ergo medicina
Te attollit a sentina,

Si quando peccaveris,
Et tu curre utrobique,
Praesens enim est ubique,
Quando invocaveris.

46. Dic, quot credis liberatos
In aeternum condemnatos

Per. Mariae meritum,
Et per crucem quot salvantur,
Qui sepulcra venerantur
Christi more debito!

47. Ecce, vides, totus mundus,
Sanctus mundus et immundus

Cuiuscunque ordinis
Utriusque ad honorem
Attenduntur et amorem

Crucis atque virginis.
48. Crux ostendit, immo Christus,
Qui in cruce fuit fixus,

Patri rivum sanguinis,
Mater pectus, lac, mamillas
Tamquam nato offert illas,

Haec sunt dona virginis.

49. Audi, benignissime pater peccatores,
Per dilectum filium fac nos meliores,
Da nobis paraclitum corrigentem mores,
O virgo dulcissima, nobis hoc implores.