98. De beata Maria V.

Non iam discordant mater virgoque, sed ipsis
Litibus exclusis se pacis ad oscula vertunt.
Hic natura silet, logicae vis exsulat omnis,
Rhetoricae perit arbitrium ratioque vacillat.
5. Haec est, quae nutu divini muneris usu

Nata patrem natumque parens concepit, honorem
Virgineum retinens nec perdens iura parentis.
Haec est stella maris, via vitae, porta salutis,
Regula iustitiae, limes pietatis, origo

10. Virtutis, veniae mater thalamusque pudoris,
Hortus conclusus, fons consignatus, oliva
Fructiferans, cedrus redolens, paradisus amoena,
Virgula pigmenti, vinaria cella, liquore
Praedita caelesti, nectar caeleste propinans,

15. Nescia spineti florens rosa, nescia culpae,
Gratia, fons expers limi, lux nubila pellens,
Spes miseris, medicina reis, tutela beatis,
Proscripti reditus, erranti semita, lumen
Caecis, deiectis requies, pausatio fessis.

20. Haec est, quae primos casus primaeque parentis
Abstersit maculas, vincens virtute reatum,
Diruta restituens, reddens ablata, rependens
Perdita, restaurans amissa, fugata repensans,
Post vespertinos gemitus nova gaudia donans,

25. Post mortis tenebras lucis novitate relucens.
Cuius ad adventum redit aetas aurea mundo,
Post famem pietas, post culpas gratia, virtus
Post vitium, pax post odium, post triste iocosum.
Ut rosa spineti compensat flore rigorem,

30. Ut dulcore suo fructum radicis amarae

Ramus adoptivus redimit, sic crimina matris
Ista luit matremque facit sua nata renasci.