29. De beata Maria V.

1. Ave, sancta, sanctis sanctior,
Tu angelis felicior,
Virtutibus sublimior
Et thronis [es] excelsior.

2. Tu Cherubim prudentior,
Tu Seraphim ardentior,
Tu sola cunctis altior,
Deo tantum inferior.

3. Solus Deus excipitur,
Cetera vincis omnia,
Dignitas tua vincitur
A sola Dei gloria.

4. A me, virgo, si lauderis,
Indigno non indigneris,
Sed habere me maiorem
Te laudando fac amorem.

5. Ave, ergo suavitatis
Nostrae tympanistria,
Via vitae, vera vitis
Et cella vinaria.

6. Ave, sponsa Salomonis,
Fermentatrix femina,
Qua vetusta Pharaonis
Relevatur sarcina.

7. Tu lucerna paradisi,
Ostium et ianua,
Tu vervecis os occisi,
Genetrix ingenua.

8. Ave, scala, qua descendit
Inclinata deitas,
Ave, litus, ad quod tendit
Nostrae molis gravitas.

9. Ave, mundi medicina,
Mundi purgans lolium,
Ave, rosa sine spina,
Castitatis lilium.

10. Ave, turris, quam vallavit
Incorrupta firmitas,
Ave, castrum, quod intravit
Sola verbi veritas.

11. Ave, scirpea fiscella,
Parvulum excipiens,
Ave, parens et puella,
Sine pari pariens.

12. Virga, virgo, nuncuparis,
Templum, vas, sacrarium,
Porta clausa, lux solaris,
Caeli luminarium.

13. Rubus ardens, madens vellus,
Gedeonis area,
Fons signatas, ferax tellus,
Granum sine palea.

14. Gemma, iubar, lar, talentum,
Spes et laus prophetica,
Cinnamomum, ros, unguentum,
Radix aromatica.

15. Palma, palmes, pavimentum,
Piscina probatica,
Botrus, hortus, uva, favus,
Thalamus, triclinium.

16. Arca, navis, aura, portus,
Luna, lampas, atrium,
Porta, manna, vallis, nubes,
Tus, muscetum, balsamum.

17.........

Murra, murtus, thronus, ced-
rus,
Ovis, apis, oleum.

18. Vitrum, uva, claustrum, cella,
Domus, aula, civitas,
Flos, fenestra, lumen, stella,
Sol, aurora, claritas.

19. Tu columba, tu columna,
Tu vitta coccinea,
Tu alatrix, tu alumna,
Tu Engaddi vinea.

20. Tu es laurus, tu oliva,
Tu peccati venia,
Tu patris es genetiva,
Mater es et filia.

21. Ergo patri, mater pia,
Natos reconcilia;
Per decus horum nominum
Da paenitendi spatium,
Confer salutem corporum
Veramque pacem cordium.