22. De beata Maria V.

1. Ave, mater sine labe,

Nostrum melos gratum habe,

Quamvis sit insipidum,
Nos informa pacis lege,
Mores orna, linguam rege,

Cor accende tepidum.

2. Quamvis sumus peccatores,
Tui sumus laudatores,

Cuius dulce gremium
Nos astringit, nos demulcet,
Ne nos perdat, nos conculcet

Fraus subtilis hostium.

3. Per te enim, quam laudamus,
Ut in luce maneamus,

In spe veri gaudii,
Datur nobis munus gratum,
Munus vere delicatum

Divini susurrii.

4. Tu es lima vetustatum,

Scaturigo novitatum,

Oliva pinguedinis,
Hic elimans nostras mentes,
Ut pinguescant non habentes

In se naevum criminis.